ئێران: پیسبوونی تیشکدەر لە بنکەی ئەتۆمی نەتەنز تۆمار کراوە

ئاڤا نیوز

دەستەی وزەی ئەتۆمی ئێران ئاشکرای دەکات، پیسبوونی تیشکدەر لەنێو دامەزراوەی ئەتۆمیی "نەتەنز" ڕووی داوە بەهۆی هێرشە ئاسمانییەکەی ئیسرائیلەوە، ڕاشیگەیاندووە هیچ پیسبوونێک لە دەرەوە نییە.

وێنە گەورەکە: بەرەبەیانی ئەمڕۆ هەینی 2025-06-13، ئیسرائیل لە ڕێگەی 200 فڕۆکەی جەنگییەوە هێرشێکی بەرفراوانی بۆ سەر 100 پێگە و بنکەی ئەتۆمیی ئەو وڵاتە ئەنجامدا.

ڕاگەیێنراوی فەرمی: دەستەی وزەی ئەتۆمی ئێران لە راگەیێنراوێکەدا دەڵێت: پێویستە تیشکەکانی ناو دامەزراوەی نەتەنز پاک بکەینەوە و دواتر هەڵسەنگاندن بۆ زیانەکان بکەین.

ئەوەی پێویستە بیزانیت: بنکەی ئەتۆمیی "نەتەنز" دامەزراوەیەکی سەرەکیی پیتاندنی یۆرانیۆمە لە ئێران، دەکەوێتە پارێزگای ئەسفەهان بەدووریی 220 کیلۆمەتر لە باشووری ڕۆژهەڵاتی تارانی پایتەخت. بە نهێنی دروستکراوە، لە ساڵی 2002 ئاشکرا بوو، بە شێوەیەک دروست کراوە کە دەیان هەزار "سانتریفیوژ" لەخۆ بگرێت، پانتایی دامەزراوەکە 2.7 کلیۆمەتر چوارگۆشەیە، هەشت مەتر لەژێر زەوییە.