وەزارەتی ڕۆشنبیری بۆ میدیاكان: ئاسایشی كوردستان هێڵی سوورە

ئاڤا نیوز

 

وەزارەتی ڕۆشنبیری پەیام بە دەزگا میدیاییەکان دەدات، ڕەچاوی دۆخی دەروونی و ئاسایشی کۆمەڵایەتیی بکەن، هەر دەزگایەکیش سەرپێچی بکات، ڕووبەڕووی لێپرسینەوەی یاسایی دەبێتەوە.

 

وێنە گەورەکە: شەڕ و ئاڵۆزییەکانی ڕۆژهەڵاتی ناوەڕاست، دۆخێکی نائاسایی لە وڵاتانی ناوچەکە دروستکردووە و کاریگەری دۆخی ژیانی هاووڵاتیان، هیچ ئاسۆیەکی ڕوونیش نییە ئەو جەنگە کەی کۆتایی دێت و سەرەنجامی چییە، سەرەڕای ئەوەش لێرە و لەوێ هەواڵی ناڕاست و بێ سەرچاوە لە بەشێک لە میدیاکان بڵاودەکرێتەوە کە ئەوەندەی تر دۆخی دەروونی خەڵکی دووچاری شڵەژان دەکات. 

 

پەیامی فەرمی: وەزارەتی ڕۆشنبیری و لاوانی حکومەتی هەرێمی کوردستان، پەیامێکی نووسراو کە وێنەیەکی دەست ئاڤا میدیا کەوتووە، ئاڕاستەی دەزگا و کەناڵە میدیاییەکان و هاووڵاتییان دەکات، بەوەی کە لەم دۆزخە ئاڵۆزەی ناوچەکەدا، ڕەچاوی لایەنی دەروونی و دۆخی ئاسایشی کۆمەڵایەتی بکەن و زانیاری و هەواڵی نادروست و بێ سەرچاوە لەبارەی هەڵکشانی گرژییەکانی ناوچەکە بڵاونەکەنەوە، هاوکات هەموو جۆرە هەواڵێک لەبارەی ئاسایشی کوردستان و زانیاری لەبارەی ڕووداوەکان، تەنیا لە سەرچاوەی فەرمی وەربگرن.

 

ئەوەی پێویستە بیزانیت: وەزارەتی ڕۆشنبیری لە پەیامەکەیدا هۆشداری دەدات لەوەی هەر دەزگایەکی ڕاگەیاندن سەرپێچی ڕێنماییەکان بکات، ڕووبەڕووی لێپرسینەوەی یاسایی دەبێتەوە.