کۆشکی سپی: بەتوندی سەرکۆنەی هێرشەکانی ئێران بۆ سەر هەولێر دەکەین

ئاڤا دیجیتاڵ

 

لە چوارچێوەی کۆڕبەندی ئابووریی جیهانی لە داڤۆس، سەرۆکوەزیران بارزانی لەگەڵ جەیک سولیڤان، ڕاوێژکاری ئاسایشی نێودەوڵەتی کۆبووەوە و چەند پرسێکی گرنگییان تاوتوێ کرد.

 

چیرۆکە سەرەکییەکە: جەیک سولیڤان، ڕاوێژکاری ئاسایشی نێودەوڵەتی لە کۆبوونەوەی لەگەڵ سەرۆکوەزیران بارزانی لە داڤۆس، "بەتوندی" سەرکۆنەی هێرشە "دوژمنکارییەکەی" ئێرانی بۆ سەر ناوچەیەکی مەدەنیی هەولێری پایتەختی هەرێمی کوردستان کرد. کۆشکی سپی ئەمەی بڵاو کردووەتەوە.

جەیک سولیڤان، ڕاوێژکاری ئاسایشی نێودەوڵەتی، قوربانییانی هێرشە مووشەکییەکەی هەولێر لەبیر نەکرد و پرسە و سەرەخۆشیی خۆی بۆ کەسوکاری قوربانییان ڕاگەیاند. 

 

بابەتە ستراتیژییەکان: لە کۆبوونەوەکەدا، سولیڤان و سەرۆکوەزیران بارزانی، باسیان لە گرنگی هەناردەکردنەوەی نەوتی هەرێـمی کوردستان و پاراستنی دەستەبەری دارایی لە عێراقەوە بۆ هەرێمی کوردستان کرد. هەروەها سەقامگیریی هەرێمی کوردستان و بژێویی خەڵکەکەی، تەوەرێکی دیکەی کۆبوونەوەکەیان بوو.

سولیڤان، پێزانینی خۆی بۆ هاوبەشی بەهێزی هەرێمی کوردستان لەگەڵ ئەمریکا دەربڕی و پشتیوانی ئەمریکای بۆ هەرێمی کوردستان دووپات کردەوە.

 

باکگراوند: لە پەراوێزی 54ـەمین کۆبوونەوەی ساڵانەی کۆڕبەندی ئابووریی جیهانی لە داڤۆس، سەرۆکوەزیران بارزانی چەندین کۆبوونەوەی گرنگی لەگەڵ سەرۆک و سەرکردە کاریگەرەکانی جیهان دەبێت. هەروەها حکومەتی هەرێمی کوردستان "ماڵی کوردستان"ـی لەوێ دروستکردووە و رۆڵێکی گرنگ لە کۆربەندەکەدا دەگێڕێت.