ڕوانگەی سووری بۆ ئاڤا: ژمارەی کوژراوانی تەقینەوەکەی دیمەشق گەیشتە 20 کەس

ئاڤا نیوز

بەڕێوەبەری ڕوانگەی سووری دەڵێت، ژمارەی کوژراوانی ‌هێرشە خۆکوژییەکەی سەر کەنیسەی مار ئیلیاس لە دیمەشقی پایتەختی سووریا گەیشتە 20 کەس، بە دەیان کەسی دیکەش بریندار بوون. 

چیرۆکی سەرەکی: ئێوارەی ڕۆژی یەکشەممە، تەقینەوەیەکی خۆکوژی لە کەنیسەی مار ئیلیاس لە شاری دیمەشق ڕوویدا، بەهۆیەوە 20 کەس کوژران و بە دەیانی دیکەش برینداربوون.

لێدوانی فەرمی: ڕامی عەبدولڕەحمان، بەڕێوەبەری ڕوانگەی سووری بە ئاڤا میدیای ڕاگەیاند، تەقینەوەکە خۆکوژی بووە و بکەری هێرشەکە سەر بە ڕێکخراروی تیرۆرستی داعش بووە، لە کاتێکدا کە کەنیسەکە زۆر قەرەباڵغ بووە و نوێژخوێنانی مەسیحی مەراسیمی ئاینییان ئەنجامداوە، تەقە لە نوێژخوێنان کراوە دواتر خۆکوژەکە خۆی تەقاندووەتەوە.

زانیاریی زیاتر: ڕوانگەی سووری ئەوەشی ڕاگەیاند، ئەوان پێشووتر هۆشدارییان داوە لەوەی چالاکییەکانی داعش لە ناوچەکە زیاتر دەبێت.

ئەوەی پێویستە بیزانیت: لە ماوەی ساڵی ڕابردووەوە یەکەمجارە هێرشێکی خۆکوژی لەم شێوەیە لە دیمەشق بکرێت.