ڕێکخراوێک ژمارەی کوژراوانی ئێران لە هێرشەکانی ئیسرائیل ئاشکرا دەکات

ئاڤا نیوز

 

ڕێکخراوێکی مافی مرۆڤ کە بنکەکەی لە ئەمریکایە، بە پشتبەستن بە سەرچاوە و ڕاپۆرتە ئێرانییەکان بڵاویکردەوە 657 کەس لە هێرشەکانی ئیسرائیل کوژراون.

 

چیرۆکی سەرەکی: ڕۆژی 13-6-2025، ئیسرائیل هێرشێکی لەناکاوی بۆ سەر ئێران دەستپێکرد، دەیان فەرماندەی باڵای ئەو وڵاتە و هاووڵاتیی سڤیلی کوشت، دەشڵێت لەپێناو پاراستنی خۆی، بەردەوام دەبێت لە هێرشەکانی.

 

بڵاوکراوەی فەرمی: ئاژانسی چالاکوانانی مافی مرۆڤ (هرانا) بڵاویکردەوە، لە سەرەتای دەستپێکردنی هێرشەکانی ئیسرائیل لە 13-6-2025ـەوە، نزیکەی 657 کەس لە سەرانسەری ئێران کوژراون کە 263ـیان هاووڵاتیی سڤیل بوون، ئەمە جگە لە برینداربوونی سەدان کەسی دیکە.

 

زانیاریی زیاتر: ئەم داتایەی رێکخراوەکەی مافی مرۆڤ لە کاتێکدایە؛ بەرپرسانی ئێران بە فەرمی رایانگەیاندووە 224 کەس بەهۆی هێرشەکانی ئیسرائیل بۆ سەر ئێران کوژراون.

 

لەلایەکی دیکەوە: سەرچاوە پزیشکییەکانی ئیسرائیل دەڵێن، تاوەکو ئێستا 25 ئیسرائیلی لە هێرشەکانی ئێران کوژران و دوو هەزار و 500 کەسی دیکەش بریندار بوون.