سەرۆک ئەرکانی سوپای ئێران: هێرشەکەی ئەمریکا بێ وەڵام تێناپەڕێت

ئاڤا نیوز

سەرۆک ئەرکانی سوپای ئێران ڕایگەیاند، هێرشەکەی ئەمریکا بۆسەر سێ وێستگەی ئەتۆمی وڵاتەکەی پێشێلکردنی سەروەری ئێران بووە، "بۆیەش بە توندیی و بە هەمان ئاست و قەبارەی دەستدرێژییەکە، وەڵامی ئەو هەڵەیەی ئەمریکا دەدەینەوە".

وێنە گەورەکە: 22ی ئەم مانگە و لە پێشهاتێکی نوێی جەنگی نێوان ئیسرائیل و ئێران، ئەمریکا سێ دامەزراوە سەرەکییەکەی تایبەت بە بەرنامە ئەتۆمییەکەی ئێران (فۆردۆ، ئەسفەهان و نەتەنز)ـی بە ئامانج گرت، ئەوەش کاردانەوەی لەسەر ئاستی جیهان لێکەوتەوە و وەک پێشهاتێکی "مەترسیدار" ناوی دەبەن.

لێدوانی فەرمی: عەبدولڕەحیم موسەوی، سەرۆک ئەرکانی سوپای ئێران ئەمڕۆ دووشەممە لە پەیامێکی ڤیدیۆییدا ئاماژەی بەوەکرد، لە سزادانی بنامین نەتانیاهۆ، سەرۆکوەزیرانی ئیسرائیل بەردەوام دەبن و ڕووبەڕووی "نەهامەتیی" دەکەنەوە، بەبێ لەبەرچاوگرتنی ئەو زیانانەی ئێرانیش لەم ماوەیەدا پێی گەیشتووە، تاران ناهێڵێت ئەو هێرشانەی کرایەسەری بێ وەڵام تێپەڕن.

ئەوەشی خستەڕوو، ئەو جوڵەیەی ترەمپ (هێرشەکەی ئەمریکا بۆسەر سێ وێستگەی ئەتۆمی ئێران) نیشانەی نائومێدبوونییەتی و هەوڵێک بووە بۆ ڕزگارکردنی بریکارەکەی کە قەوارەی ئیسرائیل و بەتایبەتیش خودی نەتانیاهۆیە.