جێگری سەرۆکی ئەمریکا: لە داهاتوودا بڕیار لەسەر یۆرانییۆمە پیتێنراوەکەی ئێران دەدەین

ئاڤا نیوز

جێگری سەرۆکی ئەمریکا دەڵێت، نازانن ئێران یۆرانیۆمە پیتێنراوەکەی بۆ کوێ گواستووەتەوە، بەڵام لە داهاتوودا واشنتن بڕیار لەسەر چۆنییەتی مامەڵەکردن لەگەڵ ئەو بابەتە دەدات.

ئەوەی پێویستە بیزانیت: وەک بەرپرسانی ئەمریکا دەڵێن، پێش هێرشەکەی 22ی ئەم مانگەی وڵاتەکەیان بۆسەر وێستگە ئەتۆمییەکانی ئێران، تاران ئاگادارکرابووەوە، بەوهۆیەش دەسەڵاتدارانی ئەو وڵاتە یۆرانیۆمی پیتێنراوییان بۆ شوێنێکی پارێزراو و نادیار گواستووەتەوە.

لێدوانی فەرمی: جەی دی ڤانس، جێگری سەرۆکی ئەمریکا ڕایگەیاند، یۆرانیۆمە پیتێنراوەکەی ئێران بەشی درووستکردنی نۆ بۆ 10 بۆمبی ئەتۆمی دەکات، لەگەڵ ئەوەشدا توانای ئێران بۆ بەدەستهێنانی چەکی ئەتۆم زۆر کەمبووەتەوە، چوونکە ئەو ئامێرانەی نەماون کە یۆرانیۆم دەپیتێنن.

لەلایەکی دیکەوە: دەسەڵاتدارانی ئێران دەڵێن، ماوەیەکی دیکە دەست بە پیتاندنی یۆرانیۆم دەکەنەوە و هەرگیز دەستبەرداری پیتاندنی یۆرانیۆم نابن.