حیزبوڵڵای لوبنان چەندین مووشەک ئاراستەی ئیسرائیل دەکات

ئاڤا نیوز

دوای ئەوەی ئیسرائیل هێرشێکی کردە سەر باشووری لوبنان، بزووتنەوەی حیزبوڵڵای لوبنان کە ئێران پشتیوانییان دەکات، چەندین مووشەکی ئاراستەی باکووری ئیسرائیل کرد.

 

چیرۆکی سەرەکی: دوێنێ شەو سوپای ئیسرائیل ئامانجێکی لە گوندی هەببارییە-ی باشووری لوبنان بۆردومان کرد و ڕایگەیاند: بنکەیەکی سەربازی بووە و پیلانی هێرشکردنە سەر ئیسرائیلیان داڕشتووە.

زانیاریی زیاتر: تیمی فریاگوزاریی نزیک لە حەماس ڕایگەیاند چەند کەسێک کوژران بەڵام ژمارەیانی دیاری نەکرد، سەرچاوەیەکی نافەرمیش ڕایگەیاند کوژراوەکان حەوت کەس بوون، حیزبوڵڵاش لە تۆڵەدا هێرشی کردە سەر باکووری ئیسرائیل.

 

لێدوانی فەرمی: حیزبوڵڵا دەڵێت: لە تۆڵەی کۆمەڵکوژییەکەی زایۆنیستی دوژمندا لە گوندی هەببارییە-ی باشووری لوبنان، دەیان مووشەکمان ئاراستەی کیریات شمۆنا کرد.

 

بۆچوونی بەرامبەر: دەزگای فریاکەوتنی ماگن دەیڤدئەدۆم ڕایگەیاند: تیمەکانی فریاگوزاریی ئیسرائیل بینایەکی شارۆچکەی کیریات شمۆنا-یان دەپشکنی کە بەر هێرشەکەی حیزبوڵڵا کەوتبوو، کەسێکی 25 ساڵیان دۆزییەوە کە بێهۆش بوو و هەناسەی نەدەدا و هەر لەوێدا ڕاگەیێنرا کە مردووە.