بۆ گەشت و سەیران ڕۆیشتبوون؛ ئافرەتێک لە خەلیفان کەوتە ناو ئاو و خنکا

ئاڤا نیوز

ئەمڕۆ دووشەممە، لە رووداوێکی دڵتەزێندا لە سنووری ئیدارەی سەربەخۆی سۆران، ئافرەتێکی تەمەن 30 ساڵ کەوتە ناو ئاو و گیانی لەدەستدا. بەپێی زانیارییەکان، ئافرەتەکە دایکی چوار منداڵە.

لێدوانی فەرمی: ڕائید ڕەوەند هاودیانی، وتەبێژی بەرگریی شارستانیی سۆران، بە ئاڤای وت: "ئافرەتەکە ناوی (فرمێسک کارزان)ـە و تەمەنی 30 ساڵە. خەڵکی شاری هەولێرە و لەگەڵ خێزانەکەی بەمەبەستی سەیران سەردانی ناوچەکەیان کردووە."

"کاتژمێر 4ـی دوای نیوەڕۆی ئەمڕۆ، لە نزیک گوندی قەمەریان لە سنووری قەزای خەلیفان، ئافرەتەکە کەوتووەتە ناو ڕووباری دۆڵی خەلان و بەداخەوە خنکاوە."

زانیاریی زیاتر: وتەبێژی بەرگریی شارستانیی سۆران ئاماژەی بەوەشکرد کە تیمەکانی مەلەوانیی بەرگریی شارستانی دەستبەجێ گەیشتوونەتە شوێنی رووداوەکە و دوای هەوڵێکی زۆر، توانیویانە تەرمەکەی لە ئاوەکە دەربهێنن و پاشان ڕەوانەی پزیشکی دادی سۆرانیان کردووە بۆ ئەنجامدانی رێکاری پێویست.