سكرتێری نەتەوەیەكگرتووەكان بۆ سەرۆكوەزیران بارزانی: بە ئامانجگرتنی هاووڵاتیی سڤیل هیچ پاساوێك هەڵناگرێت

ئاڤا دیجیتاڵ

 

پشتگیرییە نێودەوڵەتییەكان بۆ هەرێمی كوردستان و سەرۆكوەزیران بارزانی بەردەوامن، ئەنتۆنیۆ گۆتێرێس لە كۆبوونەوەی لەگەڵ سەرۆكوەزیران بارزانی هێرشەكانی سەر هەولێری ئیدانە كرد، چارەسەركردنی كێشەكانی نێوان هەولێر و بەغدای لەسەر بنەمای دەستوور بە پێویست وەسفكرد.

چیرۆكی سەرەكیی: سەرۆكوەزیران بارزانی ئەمڕۆ  لە داڤۆس، لەگەڵ ئەنتۆنیۆ گۆتێرێس سكرتێری گشتیی یەكگرتووەكان   كۆبووەوە، بابەتی سەرەكیی كۆبوونەوەكەش هێرشەكانی ئێران بوون.

لێدوانی فەرمیی: "بابەتی سەرەكی كۆبوونەوەكەمان تایبەت بوو بە هێرشی ئێران بۆ سەر هەولێر، سكرتێری گشتیی نەتەوە یەكگرتووەكان پرسە و هاوخەمیی خۆی پێگەیاندین، هاوڕابووین لەسەر ئەوەی پێشێلكردنی سەروەری عێراق و بەئامانجگرتنی هاووڵاتیانی سڤیل هیچ پاساوێك هەڵناگرێت" سەرۆكوەزیران بارزانی وادەڵێت . 

سەرۆكوەزیران بارزانی دەشڵێت "لە بەشێكی دیكەی كۆبوونەوەكەماندا، بیروڕامان لەبارەی دوایین گۆڕانكاری و پێشهاتەكانی عێراق و پێویستی چارەسەركردنی كێشەكانی هەرێمی كوردستان و حكومەتی فیدراڵ لەسەر بنەمای دەستوور ئاڵوگۆڕ كرد".

باكگراوند: درەنگانی شەوی دووشەممە 15-1-2024، سوپای پاسدارانی ئێران بە چەند مووشەكێكی بالیستی هێرشی كردە سەر هەولێر و چەند ناوچەیەكی مەدەنی كردە ئامانج، بەهۆیەوە پێنج كەس گیانیان لەدەستداو شەش كەسیش برینداربوون.