ئیسرائیل باڵیۆزخانەكانی چۆڵ دەكات

ئاڤا نیوز

لەئەگەری هێرشی ئێران بۆ بەئامانجگرتنی ئیسرائیل دوای هێرشەکەی بۆ سەر باڵیۆزخانەی ئێران لە دیمەشق، ئیسرائیل ژمارەیەک باڵوێزخانەی لە وڵاتان چۆڵ دەکات.

وێنە گەورەکە: ئەمڕۆ حکومەتی ئیسڕائیل داوای لە چەند باڵوێزێکی وڵاتەکەی کردووە کە باڵەخانەکانیان چۆڵ بکەن و بگەڕێنەوە تێلئەڤیڤ، ئەمەش لە ترسی تۆڵەسەندنەوەی ئێرانە لە بەرامبەر ئەو هێرشەی کە لە چەند ڕۆژی ڕابردوودا ئیسرائیل کردییە سەر باڵوێزخانەی ئێران لە دیمەشق.

ئەوەی پێویستە بیزانیت: حکومەتی ئیسڕائیل بە نامەی نهێنی داوای لە باڵوێزەکانی لە چەند وڵاتێک کردووە بگەڕێنەوە تێلئەڤیڤ و باڵەخانەکانیان چۆڵ بکەن، چونکە زانیارییان هەیە ئێران دەیەوێت لە تۆڵەی هێرشەکەدا یەکێک لەو باڵوێزخانانە بکاتە ئامانج.

زانیاریی زیاتر: باڵیۆزخانەکانی ئیسرائیل لە میسر و  تورکیا و بەحرەین و مەغریب و ئەردەن و چەند وڵاتێکی دیکە چۆڵکراون، چونکە ئێران بەئاسانتر لە شوێنەکانی دیکە دەستی بەو شوێنانە دەگات بەڵام ناوی وڵاتەکانی دیکە ئاشکرا نەکراون.

باکگراوند:ئیسرائیل لە 92 وڵاتی جیهان و شەش ڕێکخراوی نێودەوڵەتی باڵوێزخانە و کونسوڵخانەی هەیەو زیاتر لە 15 باڵوێزخانە و کۆنسوڵخانەیان دەکەوێتە وڵاتانی ڕۆژهەڵاتی ناوەڕاستەوە.