ئەمساڵ حاجییان لە هەرێمی كوردستانەوە ڤیزا وەردەگرن

ئاڤا نیوز

 

حاجییانی هەرێمی كوردستان بۆ بەجێگەیاندنی فەریزەی حەجی ئەمساڵ، لە هەولێرەوە ڤیزایان بۆ وەردەگیرێت و پاسپۆرتەكانیان بۆ هیچ شارێکی عێراق یان وڵاتێکی دیکە نابرێت.

 

بۆچی گرنگە: ساڵانە نزیكەی چوار هەزار و 385 كەس لە هەرێمی كوردستانەوە بۆ جێبەجێكردنی فەریزەی حەج سەردانی وڵاتی سعوودییە دەكەن و بەم هەنگاوە ئاسانکارییەکی گەورە بۆ حاجییانی هەرێمی کوردستان دەکرێت.

 

لێدوانی فەرمی: كاروان ستوونی، گوتەبێژی بەڕێوەبەرایەتی گشتیی حەج و عومرەی هەرێمی كوردستان بە ئاڤا نیوزی ڕاگەیاند، "ساڵانی پێشووتر ڤیزاكان بۆ ئوردن یان بۆ بەغدا دەبردران، بەڵام ئەمساڵ لە هەولێر كاری ڤیزایان دەكرێت، ئەوەش یەكێكە لە دەستكەوتەكانی كابینەی نۆیەمی حكومەتی هەرێمی كوردستان."

ئەوەی پێویستە بیزانیت: دەستەی حەج و عومرەی هەرێمی كوردستان بەهەماهەنگی لەگەڵ سەرۆكی دەستەی حەج و عومرەی عێراق رێككەوتنیان كردووە بۆ ئەوەی هەر لەهەولێر کاری ڤیزاکان تەواو بکرێن.

ئەمەش بزانە: ئەمساڵ فەریزەی حەج بە ڕێگەی وشكانی بە پێنج ملیۆن و 100 هەزار دینارە، بە ڕێگەی ئاسمانیش تێچووەکەی شەش ملیۆن و 350 هەزار دینارە.