ڕاگەیێنراوی حكومەتی هەرێمی كوردستان لەسەر هێرشەكەی كۆرمۆر

ئاڤا نیوز

گوتەبێژی حكومەتی هەرێمی كوردستان هێرشەكەی كۆرمۆر بە تیرۆریستی ناودەبات و گیانلەدەستدانی چوار كەس بەهۆیەوە ڕادەگەیینێت، داوای ڕاگرتنی ئەو هێرشانە و هەماهەنگی بەپەلەش لە حكومەتی عێراق دەكات.

ئەوەی پێویستە بیزانیت: ئێوارەی ئەمڕۆ هێرش كرایەسەر كێڵگەی غازی كۆرمۆر لە چەمچەماڵ، بە گوتەی   قایمقامی چەمچەماڵ  هێرشەكە كاتژمێر 6:40 خولەك بووە و لە ڕێگەی درۆنەوە بووە.

ڕاگەیێنراوی فەرمی: پێشەوا هەورامانی، گوتەبێژی حكومەتی هەرێمی كوردستان ڕایگەیاند: لەماوەی ڕابردوو هەوڵی باش دراوە بۆ باشتر کردنی کەرتی وزە و ژێرخانی ئابووری لە عێراق و بە تایبەتی لە هەرێمی کوردستان، لە کاتێکدا کە هەنگاوەکان بۆ چارەسەرکردنی کێشەکان خێرا دەکرێن، دەستی تێکدەرانە جارێکی دیکە لە کردەوەیەکی تیرۆریستیدا کێڵگەی غازی کۆرمۆریان کردە ئامانج، تا ئێستا چوار کارمەندی یەمەنی شەهیدبوون، جگە لەوەش زیانێکی زۆر بەر کێڵگەکە کەوتووە.

زانیاریی زیاتر: ئەم هێرشە دووبارانە پێویستە ڕابگیرێن و داوای هەماهەنگی و هاوکاری بەپەلە دەکەین لە دەزگا پەیوەندیدارەکانی حکومەتی فیدراڵ، بۆ ئەوەی ئەنجامدەرانی ئەم کارە تیرۆریستییە بدۆزرێنەوەو ڕادەستی یاسا بکرێن.

وێنە گەورەكە: كێڵگەی غازی كۆرمۆر ڕۆژانە چوار هەزار و 200 مێگاوات كارەبا بەرهەم دەهێنێت، دوو هەزار و 800 مێگاواتی بۆ هەرێمی كوردستان و ئەوەشی دەمێنێتەوە ڕەوانەی هەردوو پارێزگای كەركووك و مووسڵ دەكرێت.