ئاڤا نیوز کاتی گەڕاندنەوەی كەلـلەسەری ژنە نیاندەرتاڵەكەی شانەدەر ئاشکرا دەکات

ئاڤا نیوز

 

لە ساڵی 2018ـەوە کەللەسەری ژنە نیاندەرتاڵێک لە ئەشکەوتی شانەدەر لە هەرێمی کوردستان دۆزرایەوە و بەهۆی نەبوونی ئامێری پێشکەوتوو بردرایە بەریتانیا، بڕیارە دوای تەواوبوونی پشکنینی کەللەسەری ژنە نیاندەرتاڵەكەی شانەدەر، دوای ساڵێکی دیکە لە بەریتانیاوە بگەڕێنرێتەوە هەرێمی کوردستان.

 

بۆچی گرنگە: دۆزینەوەی شوێنەوارێکی نوێی وەک کەللەسەری ژنێکی نیاندەرتاڵ لە ئەشكەوتی شانەدەر لە هەولێر بۆ ناسین و پاراستنی شوێنەوار و كەلەپووری كورد گرنگە.

 

لێدوانی فەرمی: کەیفی مستەفا عەلی، بەڕێوەبەری گشتیی شوێنەواری هەرێمی کوردستان بۆ ئاڤا نیوز گوتی: بەگوێرەی پشکنینەکانی زانکۆی کامبریج و لیڤەرپوول، 3% تاوەکو 5%ـی جیناتی کورد بۆ مرۆڤی نیاردەتاڵ دەگەڕێتەوە.

 

ڕێککەوتنەکە بەمشێوەیەیە: بەهۆی نەبوونی ئامێری پێشکەوتوو بۆ پشکنینی ئێسکەپەیکەر، شوێنەوارناسانی بەریتانی کە ماوەی 10 ساڵە کار لە ئەشکەوتی شانەدەر دەکەن، كەللەسەری ژنە نیاندەرتاڵەكەیان گواستووەتەوە زانکۆی کامبریج و دوای ساڵێک دەیگەڕێننەوە هەرێمی کوردستان.

 

لەلایەکی دیکەوە: شوێنەوارناسانی بەریتانیا لە 1951 تاوەکو 1961 لە ماوەی 10 ساڵدا، دەیان ئێسکەپەیکەری مرۆڤی نیاندەرتاڵیان لە هەرێمی کوردستان دۆزیوەتەوە، کە ئێستا لە مۆزەخانەکانی بەغدا و ئەمریکا هەڵگیراون.