نەخۆشخانەکانی غەززە تەنیا بەشی سێ ڕۆژ سووتەمەنییان ماوە

ئاڤا نیوز

 

نەخۆشخانەکانی باشووری کەرتی غەززە تەنیا بەشی سێ ڕۆژ سووتەمەنییان ماوە و داخرانی ڕێڕەوە مرۆییەکان کێشەکەیانی ئاڵۆزتر کردووە. 

 

لێدوانی فەرمی: تێدرۆس ئادهانۆم، بەڕێوەبەری گشتیی ڕێکخراوی تەندرووستیی جیهانی ڕایگەیاند، ئیسرائیل ڕێگر بووە لە گەیشتنی ئەو بڕە سووتەمەنییەی کە ئاژانسەکەیان بۆ غەززە دابینیان کردووە، گوتیشی: "داخرانی سنوورەکان کێشەی زۆری بۆ گەیاندنی یارمەتییە مرۆییەکانی دیکەش درووست کردووە و بەبێ سووتەمەنی خزمەتگووزارییە مرۆییەکانی دیکەش دەوەستن".

 

ئەوەی پێویستە بیزانیت: بەهۆی پچڕانی کارەباوە، نەخۆشخانەکانی غەززە بۆ داگیرساندنی موەلیدە و بەرهەمهێنانی کارەبا بە شێوەیەکی سەرەکی پشت بە سووتەمەنی دەبەستن.

 

وێنە گەورەکە: ماوەی حەوت مانگە شەڕ لە غەززە بەردەوامە و نزیکەی 35 هەزار کوژراوی لێکەوتووەتەوە، هەوڵەکان بۆ ئاگربەست لە نێوان حەماس و ئیسرائیل تاوەکو ئێستا بێ ئەنجام بوون.