لە سلێمانی دوو تۆمەتبار بە تاوانی دزیکردن لە باوکیان دەستگیرکران

ئاڤا دیجیتاڵ

دوو هاوڵاتی پارێزگای زیقار لە باشووری عێراق دوای ئەوەی 35 ملیۆن دینار لە باوكیان دەدزن و هەڵدێن بۆ سلێمانی، لەلایەن ئاسایشی سلێمانییەوە دەستگیر دەكرێن.

چیرۆکی سەرەکی:   لە دوای کەمتر لە چوار کاتژمێر دیارنەمانی دوو هاووڵاتی پارێزگای زیقار، کە لەلایەن کەسوکاریانەوە گوماندەکرا ڕفێنرابن، لە لایەن ئاسایشی سلێمانی دۆزرانەوە و دەرکەوت تۆمەتبارن بە دزینی 35 ملیۆن دینار لە باوکیان و خۆیان حەشارداوە .

لێدوانی فەرمی: بەڕێوەبەرایەتی ئاسایشی پارێزگای سلێمانی لە ڕاگەیێندراوێكدا ڕایگەیاند "لەدوای بەدەستگەیشتنی نوسراوێکی پۆلیسی پارێزگای زیقار، لەسەر سکاڵای باوکێک سەبارەت بە دیارنەمانی دوو کوڕە هەرزەکارەکەی،  هێزەکانی ئاسایش دوای کۆکردنەوەی زانیاری و بەدواداچوون، دەرکەوت لەڕێگەی گروپێکی گەشتیارییەوە هاتوونەتە شاری سلێمانی و لە هۆتێلێکدا ماونەتەوە، پاش لێکۆڵینەوە لەگەڵیان دەرکەوت بڕی 35 ملیۆن دیناری عێراقییان لە باوکیان بردووە و خۆیان حەشارداوە" .

ئاسایشی سلێمانی دەشڵێت " لە ئێستادا هەردوو تۆمەتبار ڕووبەڕووی یاسا کراونەتەوە".