ئەمریكا دەتوانێت مافی ئەندامیەتیی هەمیشەیی فەڵەستین ڤیتۆ بكات؟

ئاڤا نیوز

ئەمڕۆ ئەنجوومەنی نەتەوە یەکگرتووەکان بە زۆرینەی دەنگ، بڕیاری ئەندامیەتیی هەمیشەیی فەڵەستینی پەسەند کرد.

وێنە گەورەکە: بۆ ئەوەی فەڵەستین بتوانێت ببێتە ئەندامی هەمیشەیی ئەنجوومەنی ئاسایشی نەتەوە یەکگرتووەکان، ئەمڕۆ ئەنجوومەنەکە کۆبووە، بڕیارە دوو کاتژمێری دیکە دەنگدانی کۆتایی لەسەر بکرێت، پرسیارەکە ئەوەیە ئایا ئەمریکا دەتوانێت بڕیارەکە ڤیتۆ بکات؟

لێدوانی فەرمی: دکتۆر محەمەد شەریف، مامۆستای پەیوەندییە نێودەوڵەتییەکان و دیپلۆماسییەت لە زانکۆی کوردستان- هەولێر بە ئاڤا نیوزی گوت:"ئەگەر دوو لەسەر سێی ئەندامانی ئەنجوومەنی گشتیی نەتەوە یەکگرتووەکان بە بەڵێ دەنگی پێبدەن دەبێت بڕیارەکە بچێتەوە ئەنجوومەنی ئاسایش و ئەمریکاش دەتوانێت ڤیتۆی بکات".

لە لایەکی دیکەوە: شوكرییە برادۆست، ماستەر لە ئاسایشی نێودەوڵەتی بە ئاڤا نیوزی گوت: "بڕیارەکانی ئەنجوومەنی گشتیی نەتەوە یەکگرتووەکان بۆ ئەندامبوون دەبێت بچێتەوە ئەنجوومەنی ئاسایش، هەر بڕیارێک لە ئەنجوومەنی گشتی پەسەند کرا زیاتر بڕیارێکی سیمبولییە و دەبێت بچێتەوە ئەنجوومەنی ئاسایش و لەوێش ئەمریکا دەتوانێت ڤیتۆی بکات".

ئەوەی پێویستە بیزانیت: پێشتر پڕۆژەبڕیارێک بۆ ئەندامیەتیی هەمیشەیی فەڵەستین لە ئەنجوومەنی ئاسایش گەڵاڵە کرا و دەنگی زۆرینەی بەدەست هێنا، بەڵام ئەمریکا بڕیارەکەی ڤیتۆ کرد.