پرسی دانانی قەیومەکان لەجێی سەرۆک شارەوانییەکانی دەم پارتی سەرهەڵدەداتەوە

ئاڤا نیوز

دوای هەڵبژاردنی شارەوانییەکانی 31ی ئاداری تورکیا، پرسی دانانی قەیومەکان لە شوێنی ئەو شارەوانییانەی دەم پارتی بردییەوە، بووەتە سەردێڕی هەواڵەکانی تورکیا.

 

لێدوانی فەرمی: سەرچاوەیەکی نزیک لە ئاکپارتی بە ئاڤا نیوزی ڕاگەیاند، ئامادەکاری بۆ دانانی قەیومەکان لە شوێنی شارەوانییەکانی دەم پارتی دەکرێت، بەڵام بەهۆی سەرقاڵی ئاکپارتی،  پرۆسەکە خاوبووەتەوە.

بۆچوونی لایەنی بەرامبەر: حەسەن ئۆزگەنوش، پەرلەمانتاری پێشووی دەم پارتی بە ئاڤا نیوزی گوت: ئەو سەردەمە بەسەرچوو ئاکپارتی دەسەڵاتی ئەوەی هەبێت، شارەوانییەکان لە دەم پارتی وەربگرێتەوە، نە قەیومەکان لای خەڵک متمانەیان ماوە، نە ئاکپارتی هێزی جارانی ماوە و ئەمجارەیان بە هەموو شێوەیەک ڕێگری دەکەین.

 

ئەوەی ئێستا ڕوودەدات: ئەمجارەیان دۆخەکە جیاوازترە، لەبەرئەوەی پارتی براوەی تورکیا، پارتی گەلی کۆماری (جەهەپە)، پشتیوانی لە دەم پارتی دەکات.

 

زانیاری زیاتر: لە هەڵبژاردنەکانی 31 ئادار، دەم پارتی دوو گەورە شارەوانی و هەشت شارەوانی پارێزگاکانی لە باکووری کوردستان بردەوە.