بەریتانیا داوا لە ئێران دەکات گرژییەکانی رۆژهەڵاتی ناوەڕاست کەم بکاتەوە

ئاڤا دیجیتاڵ

 

دوای  هێرشە درۆنییەکەی سەر بنکەیەکی سەربازیی هێزەکانی ئەمریکا لە ئوردن،  بەریتانیا داوا لە ئێران دەکات کە گرژییەکانی ناوچەی رۆژهەڵاتی ناوەڕاست کەم بکاتەوە. 

لێدوانی فەرمی: ریشی سوناک، سەرۆکوەزیرانی بەریتانیا رایگەیاند "ئێمە نیگەرانین و داوا لە ئێران دەکەین لە کەمکردنەوەی گرژییەکانی ناوچەکە بەردەوام بێت". گوتیشی ” لەگەڵ هاوپەیمانانمان دەوەستین بۆ هێنانی سەقامگیری و ئاسایش بۆ ناوچەکە ئەوەش ئەوەیە کە ئێمە لە کاری لە سەر دەکەین.”

زانیاریی زیاتر: ئەمریکا ئێران بە پاڵپشتیکردنی هێزە میلیشیاییە هێرشبەرەکان تۆمەتبار دەکات. لە بەرامبەردا ئێران نکۆڵی لەوە کردووە کە دەستی لەو هێرشەدا هەبووبێت. 

لەلایەکی دیکەوە: گوشارەکان لە ناوخۆی ئەمریکا لە سەر جۆ بایدن، سەرۆكی ئەمریکا زیاتر دەبن بەوەی تۆڵەی هێرشەکە بکاتەوە و وەڵامێکی توندی ئێران بداتەوە، وەك چۆن جۆن كێربی گوتەبێژی كۆشكی سپی لە دواین لێدوانیدا گوتی "بایدن بیر لەوە دەكاتەوە وەڵامێكی گونجاوی ئێران بداتەوە بەڵام كاتەكەی دیار نییە".

باکگراوند: لە هێرشی درۆنیی بۆ سەر بنکەی تاوەر22ی هێزە سەربازییەکانی ئەمریکا لە ئوردن، سێ سەربازی ئەمریکی کوژران و 34ی دیکەش بریندار بوون. لەوەتەی شەڕی ئيسرائیل و حەماس دەستی پێکردووە، زیاتر لە 158 جار هێرش کراوەتە سەر هێزەکانی ئەمریکا لە ناوچەکە، بەڵام ئەمە یەکەمجارە بە هۆی ئەو هێرشانەوە سەربازی ئەمریکی بكوژرێن.