وەزارەتی تەندروستی ستیكەری نوێ بۆ دەرمان بەكاردەهێنێت

ئاڤا نیوز

وەزارەتی تەندروستی حكومەتی هەرێمی كوردستان ڕایگەیاند ستیکەری نوێی دەرمان بەكاردەهێنێت، دەشڵێت ستیكەرەكە دڵنیاییدەدات لە بەرزیی کواڵیتی، سەلامەتی و کاریگەریی بەرهەمە دەرمانسازی و پزیشکییەکان.

ئەوەی پێویستە بیزانیت: ستیكەرەكە ناوی كۆمپانیای هاوردە، ژمارەی باج، ژمارەی داواكردن، نرخی دەرمانی تێدایە.

لێدوانی فەرمی: سەركار سورچی، گوتەبێژی وەزارەتی تەندروستی بە ئاڤا نیوزی گوت: بۆ ڕێگریکردن لە ساختەکاری، لە لای ڕاستی ستیکەرە نوێیەکەوە موگناتیسێک هەیە کە جۆرێکی تایبەت مەرەکەبی تێدایە و ساختە ناکرێت، لەکاتی نزیکخستنەوەی موگناتیسی تایبەت (لە دەرمانخانەکان هەیە)، ڕەنگی بۆ سەوز دەگۆڕێت.

زانیاریی زیاتر: لە لای چەپی ستیکەرەکە، بارکۆدێک هەیە، لەکاتی سکان کردن بە ئەپی "QR Code Scaner"  کامێرای مۆبایل، کۆمەڵێک زانیاری بە سێ زمان "کوردی، ئینگلیزی و عەرەبی" لەسەر ناو، نرخ، وڵاتی سەرچاوە و جۆری بەرهەم دەخاتەڕوو.