وەزیری نەوتی عێراق: بۆ هەناردەکردنەوەی نەوتی کوردستان لەگەڵ توركیا لە دانوستانداین

ئاڤا نیوز 

وەزیری نەوتی عێراق ڕایگەیاند، بۆ دەستپێکردنەوەی هەناردەی نەوتی هەرێمی کوردستان لەڕێی بەندەری جەیهانەوە لەگەڵ توركیا لە دانوستاندان، ئاماژە بەوەش دەکات لە دانوستانەكانی نێوان هەولێر و بەغدا پێشكەوتن هەیە.

وێنە گەورەكە: شاندێكی هەرێمی كوردستان بۆ گفتوگۆكردن لەبارەی چەند پرسێک دوێنێ لە بەغدا بوو، گرنگترینیان پرسی هەناردەكردنەوەی نەوتی هەرێمی كوردستان بوو و تاڕادەیەكی زۆر پێشكەوتن لە گفتوگۆكاندا هەیە.

لێدوانی فەرمی: حەیان عەبدولغەنی، وەزیری نەوتی عێراق لە چاوپێكەوتنێكدا لەگەڵ كەناڵی عێراقیە لەبارەی گفتوگۆکانی نێوان هەولێر و بەغدا و کۆمپانیاکان ڕایگەیاند: "بەرەوپێشچوون هەیە لە دانوستەكانی بەغداد و هەرێم لەبارەی بۆری نەوتی عێراقی - توركی، لەگەڵ توركیا لە دانوستانداین بۆ دەستپێكردنەوەی هەناردەی نەوت لەڕێی بەندەری جەیهانەوە".

بۆچوونی لایەنی بەرامبەر: مایێلز كاكێنز، گوتەبێژی كۆمەڵەی پیشەسازیی نەوتی كوردستان بە ئاڤا نیوزی ڕاگەیاند: "پێشوازی لە هەر بەرەو پێشچوونێک دەكەین لە پەیوەندییەكانی نێوان هەولێر و بەغدا لەبارەی پرسی هەناردەكردنی نەوت".