گیانلەدەستدانی حاجییان لە هەزار کەس نزیک دەبێتەوە

ئاڤا نیوز

ئاماری گیانلەدەستدان بۆ وەرزی حەجی ئەمساڵ نزیکبووەوە لە هەزار، زۆرینەیان میسرین و نزیکەی 20 یشیان خەڵکی هەرێمی کوردستانن.

وێنە گەورەکە: ساڵانە لە وەرزی حەج سەدان حاجی بە هۆکاری جیاواز گیان لەدەست دەدەن. ژمارەی حاجییانی ئەمساڵ ملیۆنێک و 833 هەزار و 164 حاجی بوو، لەو ژمارەیە تائێستا 929 یان گیانیان لەدەست داوە.

زانیارییە فەرمییەکان: سەرچاوەیەکی دیپلۆماسی بە ئاژانسی فرانس پرسێسی ڕاگەیاندووە، ژمارەی گیانلەدەستدان لە ڕیزی حاجیانی میسری "بە لایەنی کەمەوە بەرزبووەتەوە بۆ 600 کەس".

زانیاریی زیاتر: بەرپرسانی میسر لە سعودیە "تا ئێستا هەزار و 400 ڕاپۆرتیان لەبارەی بێسەروشوێنبووەکان پێگەیشتووە"، ئەم ژمارەیە ژمارەی گیانلەدەستدانەکانیش دەگرێتەوە.

هۆکارە زانراوەکان: لەپاڵ قەرەباڵغی زۆر، بەرزبوونەوەی پلەی گەرما بە هۆکاری سەرەکی دادەنرێت، کە لە سەرەتای ئەم هەفتەیە لە شاری مەککە گەیشتە 51.8 پلە.

ژمارەکان وادەڵێن: بەگشتی ژمارەی گیانلەدەستدان بۆ وەرزی حەجی ئەمساڵ گەیشتووەتە 929 حاجی:

- 600 میسری
- 132 ئەندەنووسی
- 68 هیندی
- 60 ئوردنی
- 35 توونسی
- 11 ئێرانی
- سێ سەنیگالی
- نزیکەی 20 هاونیشتمانیی هەرێمی کوردستان