سەرۆکوەزیرانی ئیسرائیل داوای پلانی نوێ بۆ ڕەفەح دەکات

ئاڤا دیجیتاڵ

بنیامین نەتەنیاهۆ، سەرۆکوەزیرانی ئیسرائیل، دەیەوێت هاووڵاتیانی ڕەفەح ناوچەکە چۆڵ بکەن، بۆ ئەوەی هێرشێکی فراوان دەستپێبکەن، بۆ ئەو مەبەستەش داوای پلان لە سوپا دەکات.

وێنە گەورەکە: نەتانیاهۆ داوای لە سوپای  وڵاتەکەی کردووە پلانێک بۆ "چۆڵکردنی ناوچە سڤیلنشینەکانی" ڕەفەح دابڕێژێت، کە دوو ملیۆن و 400 هەزار کەسی تێدا نیشتەجێیە و دوا پەناگەی هاووڵاتیانی بێ ماڵی خەڵکی غەزەیە.

هۆکارە زانراوەکان: ئیسرائیل پلانێکی هێرشی چڕی بۆ ڕەفەح هەیە، هەر بۆیە سەرۆکوەزیرانی ئیسرائیل فەرمانی بە سەرجەم بەرپرسە ئەمنییەکان کردووە بە خستنەڕووی پلانێک بۆ چۆڵکردنی ڕەفەح و نەهێشتنی لیواکانی حەماس لەو شارە.

لێدوانی فەرمی: نووسینگەی نەتانیاهۆ ڕایگەیاندووە: "مەحاڵە ئامانجی شەڕەکە بێ نەهێشتنی حەماس و جێهێشتنی چوار کەتیبەی حەماس لە ڕەفەح بەدیبهێنرێت، بەپێچەوانەوە ڕوون و ئاشکرایە هەر چالاکییەکی چڕی سەربازی لە ڕەفەح پێویستی بە چۆڵکردنی ناوچە سڤیلنشینەکان هەیە".

مەترسییە پێشبینیکراوەکان: ئەمریکا و نەتەوەیەکگرتووەکان هۆشداری دەدەن لەوەی "کارەساتی مرۆیی" لە ڕەفەح دەخولقێت و ناوچەکە بەرەو ئاراستەیەکی نادیار دەچێت، بۆیە نابێت ئیسرائیل هیچ هێرشێک بکات بەبێ ڕەچاوکردنی پاراستنی خەڵکی سڤیل.

باکگراوند: لە وەڵامی هێرشە دەستپێشخەرییەکەی حەماس، زیاتر لە چوار مانگە ئیسرائیل کەرتی غەزە بۆردوومان دەکات، بەهۆیەوە ژمارەی گیانلەدەستدان گەیشتووەتە 27 هەزار و 940 کەس، زۆربەشیان ژن و منداڵن.