لە سووریا بە مووشەک هێرشکرایە سەر بنکەیەکی ئەمریکا

ئاڤا دیجیتاڵ

بە مووشەک هێرش دەکرێتە سەر بنکەیەکی سەربازیی ئەمریکا لە دێرەزرووی ڕۆژھەڵاتی سووریا، بەرەی مقاوەمەش بەرپرسیارێتی هێرشەکە لەئەستۆ دەگرێت.

زانیارییە بەدەستهاتووەکان: ئەمشەو بە ژمارەیەک مووشەک هێرشکرایە سەر بنکەی سەربازیی ئەمریکا لەنێو کێڵگەی گازی کۆنۆکۆ و دەنگی چەند تەقینەوەیەک لە کێڵگەکە بیسترا. تاوەکو ئێستاش ئاماژە بە هیچ زیانێک نەکراوە.

زانیاری زیاتر: گرووپە چەکدارە عێراقییەکانی نزیک لە ئێران ناسراو بە بەرەی مقاوەمە، بەرپرسیارێتی خۆیان لە هێرشەکە ڕاگەیاند و دەڵێن بە سێ مووشەک هێرشەکەیان کردووە، بەڵام ئاماژەیان بە شوێنی ئاراستەکردنی مووشەکەکان نەکردووە.

ئەوەی پێویستە بیزانیت: کێڵگەی کۆنۆکۆ دەکەوێتە دێرەزووری ڕۆژهەڵاتی سووریا و لەژێر کۆنترۆڵی هێزەکانی ئەمریکا و هێزەکانی سووریای دیموکرات - هەسەدەیە.

ئەمەش بزانە: هێرشەکە کاردانەوەیە بەرامبەر هێرشەکەی دوو ڕۆژ پێش ئێستای ئەمریکا لە بەغدا کە بەهۆیەوە دوو سەرکردەی کەتائیب حیزبوڵڵا کوژران، ئەوکات بەرەی مقاوەمە هەڕەشەی تۆڵەکردنەوەی کرد.

باکگراوند: بەهۆی جەنگی حەماس -ئیسرائیل لە غەززە کە زیاتر لە چوار مانگە هەڵگیرساوە، تاوەکو ئێستا زیاتر لە 160 هێرش لەلایەن گرووپە چەکدارەکانی نزیک لە ئێران کراونەتە سەر هێزەکانی ئەمریکا، دیارترین هێرش کۆتایی مانگی ڕابردوو بوو بۆ سەر بنکەیەک لە ئوردن کە بووە هۆی کوژرانی سێ سەربازیی ئەمریکی.

لە وەڵامدا ئەمریکا هێرشی تۆڵەی دەستپێکرد، لە یەکەم هەنگاودا 85 بنکە و بارەگای گرووپە چەکدارەکانی لە عێراق و سووریا بۆردوومان کرد و بەهۆیەوە دەیان چەکدار کوژران و بریندار بوون، دوو ڕۆژ پێش ئێستاش بە فڕۆکەی بێفڕۆکەوان لە بەغدا هێرشی کردە سەر دوو سەرکردەی کەتائیب حیزبوڵڵا.