پارتی: ئامادەین کۆبوونەوەی دوو لایەنە لەگەڵ یەكێتیی بکەین

ئاڤا نیوز 

 

بەرپرسی مەکتەبی ڕێکخستنی پارتی لە پارێزگای سلێمانی ڕایگەیاند، بەرژەوەندیی هاوبەش سەرجەم لایەنە کوردستانییەکان کۆدەکاتەوە و "بەبێ عەرەب و تورکمان ناتوانین پارێزگارێکی کوردی سەربەخۆ لە کەرکووک هەڵبژێرین".

 

وێنە گەورەکە: بەرپرسی مەکتەبی ڕێکخستنی پارتی لە پارێزگای سلێمانی سەردانی لێپسراوی ئەنجوومەنی پاراستنی بەرژەوەندییەکانی یەکێتیی کرد و هەڵوەستەیان لەسەر چەند پرسێکی هەنووکەیی کرد، لەنێویاندا پرسی هەڵبژاردنی پەرلەمانی کوردستان و دانانی پارێزگاری کەرکووک لەو بابەتانە بوون کە گفتوگۆیان لەبارەوە کرا. 

 

لێدوانی فەرمی: عەلی حوسێن، بەرپرسی مەکتەبی ڕێکخستنی پارتی دیموکراتی کوردستان لە سلێمانی-هەڵەبجە-ڕاپەرین ڕایگەیاند، "بەبێ عەرەب و تورکمان ناتوانین پارێزگارێکی کوردی سەربەخۆ لە کەرکووک هەڵبژێرین، بە ڕێککەوتن بە تەنیا لەگەڵ لایەنێک ناتوانین حکومەتی خۆجێیی پێک بهێنین".

 

زانیاریی زیاتر: عەلی حوسێن لەبارەی هەڵوێستی پارتی بۆ کۆبوونەوە لەگەڵ یەکێتی گوتی "پارتی ئامادەیە کۆبوونەوەی دوولایەنە لەگەڵ یەكێتیی بکات".

 

بۆچوونی لایەنی بەرامبەر: جەعفەر شێخ مستەفا، لێپسراوی ئەنجوومەنی پاراستنی بەرژەوەندییەکانی یەکێتیی ڕایگەیاند، "پارێزگاری کەرکووک بە حیزبێک یەکلایی نابێتەوە. یەکێتیی لەگەڵ ئەوەدایە ئەو پۆستە لە بەرژەوەندی بۆ ئێمە بێت و هەر کاتێک پێویست بکات لەگەڵ پارتی کۆدەبینەوە".