کامالا هاریس بە فەرمی بووە بەربژێری دیموکراتەکان

ئاڤا نیوز  

کامالا هاریس، جێگری سەرۆکی ئەمریکا  بە فەرمی بووە بەربژێری دیموکراتەکان بۆ سەرۆکایەتی ئەمریکا، دوای ئەوەی لیژنەی نیشتمانی پارتەکە ئەنجامی کۆتایی پرۆسەی دەنگدانی ئۆنلاینی بڵاوکردەوە.

وێنە گەورەکە: دوای کشانەوەی جۆ بایدن لە کێبڕکێی هەڵبژاردنەکان، هاریس توانی دەنگی پێویستی نوێنەرانی دیموکراتەکان لە دەنگدانێکی ئەلکترۆنیدا بۆ بەربژێری بەدەست بێنێت و بڕیارە لە کۆنگرەی دیموکراتەکاندا بە فەرمی ئەمە ڕابگەیێنرێت.

چی ڕوودەدات: بەرەبەیانی ئەمڕۆ سێشەممە 6-8-2024 بە کاتی هەولێر، دوای پێنج ڕۆژ لە دەنگدانی ئۆنڵاینی نوێنەرانی پارتی دیموکرات، کامالا هاریس، جێگری سەرۆکی ئەمریکا بە فەرمی بووە بەربژێری پارتی دیموکرات.

زانیاریی زیاتر: چاوەڕوان دەکرێت ئەمڕۆ سێشەممە کامالا هاریس بەربژێربوونی لەلایەن پارتەکەیەوە بە فەرمی ڕابگەیێنێت و هاوکات جێگری خۆی بۆ کۆشکی سپی دەستنیشان بکات.

ئەوەی پێویستە بیزانیت: 5-11-2024 هەڵبژاردنی سەرۆکایەتیی ئەمریکا بەڕێوە دەچێت. ئەگەر هاریس بتوانێت هەڵبژاردنەکە لە ترەمپ بباتەوە، ئەوا دەبێتە یەکەم ژن کە بووبێتە سەرۆکی ئەمریکا.