هێزێکی پێشمەرگە بۆشاییە ئەمنییەکەی کوڵەجۆ پڕ دەکاتەوە

ئاڤا نیوز 

 

وەزارەتی پێشمەرگە بڕیاری داوە هێزێکی ئەمنی بنێرێتە کوڵەجۆ بۆ پڕکردنەوەی ئەو بۆشاییەی بەیانیی ئەمڕۆ حەشدی شەعبی هێزی بۆ هێنابوو.

 

وێنە گەورەکە: لەدوای کۆتاییهاتنی شەڕی داعش بەشێک لەو ناوچانەی لەنێوان هێزی پێشمەرگە و سوپای عێراق بوون وەک بۆشایی ئەمنی هەژمار دەکران، بەگوێرەی ڕێککەوتنی عێراق و هەرێمی کوردستان لیوای هاوبەش لەو ناوچانە دادەنرێن، بەڵام تاوەکو ئێستا دانەنراوە. 

 

لێدوانی فەرمی: ئەکرەم ساڵح، بەرپرسی لقی 22ـی گەرمیانی پارتی دیموکراتی کوردستان بە ئاڤا نیوزی گوت: بڕیارە هێزێکی پێشمەرگە لەنزیکترین کاتدا لەو ناوچەیە دابنرێت کە ئەمڕۆ حەشدی شەعبی نزیکەی هەشت سەعات لێی مایەوە.

 

زانیاریی زیاتر:  ئەو بۆشایەی لە سنووری ناحیەی کوڵەجۆ هەیە، دەکەوێتە نێوان میحوەری یەک و دوو، ئەکرەم ساڵح دەڵێت: ئەرکی وەزارەتی پێشمەرگەیە ئەو بۆشاییە پڕ بکاتەوە.

 

ئەوەی پێویستە بیزانیت: کاتژمێر 04:00ـی بەیانیی ئەمڕۆ هێزێکی گەورەی حەشدی شەعبی بە هەمەری سەربازی هاتنە ناحیەی کوڵەجۆ و دەستیان بەسەر بیرە نەوتی قەمەردا گرت، بەڵام دوای مانەوەی نزیکەی هەشت کاتژمێر هێزەکەی حەشدی شەعبی پاشەکشەی کرد و گەڕانەوە بۆ دیالە.