بەرپرسێکی ئێران: 144 زیارەتکار لە چلەی ئیمام حوسێن گیانیان لەدەستداوە

ئاڤا نیوز

 

بە گوێرەی پەرپرسانی ئێران ئەمساڵ 144 زیارەتکاری بیانی لە چلەی ئیمام حوسێن گیانیان لەدەستداوە. 

 

چیرۆکی سەرەکی: 28-8-2024 بەبۆنەی چلەی ماتەمینیی ئیمام حوسێن، زیاتر لە 21 ملیۆن زیارەتکاری ناوخۆ و دەرەوەی عێراق سەردانی مەزارگەی ئیمام حوسێنیان کرد لە کەربەلا، لەو ژمارەیەش 3.5 ملیۆن زیارەتکارییان بیانی بوون.

 

لێدوانی فەرمی: ڕەزا حاج منوجهری، بەڕێوەبەری بەشی قەیران لە ڕێکخراوی پزیشکی دادوەری ئێران بە ئاژانسی "ئیرنا"ـی ڕاگەیاندووە:  لە ڕێوڕەسمی چلەی ئیمام حوسێن دا لە کەربەلا، 144 زیارەتکار گیانیان لەدەستداوە و لەو ژمارەیەش 106 کەسیان ئێرانی بوون، ئەوانی دیکەش ئەفغانی و پاکستانی بوون.

 

ژمارەکان وادەڵێن: لەو ژمارانەی بڵاوکراونەتەوە 17 کەسیان لەناو خاکی عێراقدا گیانیان لەدەستداوە، زۆرترین حاڵەتی مردنیش بەهۆی ڕووداوی هاتووچۆوە بووە و 119 زیارەتکار بە ڕووداوی هاتووچۆ گیانیان لەدەستداوە، ئەوانی دیکەش بە ڕووداوی وەک تەزووی کارەبا، ئاگرکەوتنەوە و جەڵتەی دڵ مردوون.