ئاڤا مۆڵەتی مافی مانەوەی بەهزاد خوسرەوی بڵاو دەکاتەوە

ئاڤا نیوز 

 

بە بیانووی نەبوونی مافی مۆڵەتی مانەوە (ئیقامە)  ئاسایشی سلێمانی ئەندامێکی حیزبی دیموکراتی کوردستانی ئێران ڕادەستی تاران دەکاتەوە، ئاڤا نیوزیش لە بەدواداچوونێکدا مۆڵەتی مافی مانەوەی ئەو ئەندامەی دەستکەوتووە و تیایدا دەرکەوتووە کە بەهزاد مۆڵەتی مانەوەی تاوەکو ناوەڕاستی مانگی 12ی ئەمساڵ هەیە. 

 

چیرۆکی سەرەکی: هەفتەی ڕابردوو ئاسایشی سلێمانی ئەندامێکی حیزبی دیموکراتی کوردستانی ئێرانی لە سلێمانی دەستگیرکرد و دواتریش ڕادەستی ئێرانی کردووەتەوە و ئەمەش کاردانەوەی بەدوای خۆیدا هێنا.

 

 

وێنەی بەهزاد خوسرەوی تەمەن 35 ساڵ کە خاوەن پێداویستیی تایبەت بووە و ئەندامی حیزبی دیموکراتی کوردستانی ئێران بووە.

 

"مەترسی لەسەر ژیانی هەیە و دەبێت پارێزگاریی لێبکرێت" 

 

بەڵگەنامەی فەرمی: ئاڤا نیوز مۆڵەتی فەرمی مانەوە و نیشتەجێبوونی بەهزاد خوسرەوی دەستکەوتووە و لە ناوەڕۆکەکەیدا دەرکەوتووە کە بەهزاد مۆڵەتی مافی مانەوەی [ئیقامەی] تاوەکو 13-12-2024 کارابووە. 

 

قووڵتر: بەهزاد لە هەرێمی کوردستان داوای مافی پەنابەرێتی کردووە، لە بەرامبەر ئەوەشدا نەتەوە یەکگرتووەکان بە نووسراوێکی فەرمی لە بارەی کەیسی بەهزاد دەڵێت: "لەبەر ئەوەی گەڕانەوەی بە زۆری بۆ وڵاتێک وەک دەڵێن، ژیان یان ئازادیان تووشی هەڕەشە دەبێت، تاوەکو بڕیاریی کۆتایی لەسەر داواکارییەکانی دەکرێت، پێویستە پارێزگارییان لێ بکریت و نەنێردرێتەوە بۆ ئێران".

 

کۆپییەکی مۆڵەتی مافی مانەوەیی بەهزاد لە ئاسایشی سلێمانی کە تێیدا دەردەکەوت مۆڵەتی مانەوەی لە سلێمانی هێشتا کارایە و ئەو نووسراوەی نەتەوە یەکگرتووەکان کە داوای پاراستنی گیانی بەهزاد دەکات. 

 

زانیاریی زیاتر: کۆمسیارانی باڵای نەتەوە یەکگرتووەکانی بۆ کاروباری پەنابەران گەواهی دەدات کە ئەو کەسەی ناوی هاتووە، داوای مافی پەنابەرێتی کردووە، هەروەها "لە پێدانی ئەم جۆرە مۆڵەتە تەنیا لە دەسەڵاتی لایەنی پەیوەندیداری عێراق دایە، کۆمیسیۆنی باڵا پێزانینی خۆی دەردەبڕێت بۆ هەر هاوکارییەک کە پێشکەش بە کەسانی ئاوارە دەکرێت".

 

لەلایەکی دیکەوە: ئاسایشی سلێمانی ڕایگەیاند، بەهزاد لەناو شاری سلێمانی دەستگیرکراوە، لە ئەنجامی لێکۆڵینەوەکان دەرکەوت کە "مۆڵەتی مانەوە و نیشتەجێبونی هەرێمی کوردستانی نییە".

 

ئەوەی پێویستە بیزانیت: بەهزاد خوسرەوی چالاکوانێکی خەڵکی سەقزی ڕۆژهەڵاتی کوردستانە و لە سلێمانی دەژیا، خاوەن پێداویستیی تایبەت بووە. بەپێی ڕاپۆرتێکی ڕێکخراوی هەنگاو، دوای دەستگیرکردن و ئەشکەنجەدانی لەلایەن هێزە ئەمنییەکانی سلێمانی ڕادەستی ئێران کراوەتەوە.

 

ئەمەش بزانە: ئەو چالاکوانە ئەندامی حیزبی دیموکراتی کوردستانی ئێران بووە، هاوکات ئەندامی فەرمی کۆمیسیاری باڵای پەنابەرانی نەتەوە یەکگرتووەکان بووە.