حکومەتی عێراق: تاوەکو سەری ساڵ مووچەی فەرمانبەرانی هەرێمی کوردستان دەنێرین

ئاڤا نیوز

 

 

لە کۆبوونەوەی ئەنجوومەنی وەزیرانی عێراق لەسەر بڕیاری وەزیری دارایی عێراق ڕەزامەندی لەبارەی مووچەی ئەمساڵی فەرمانبەرانی هەرێمی کوردستان دا و تاوەکو سەری ساڵ بێ هیچ کێشەیەک مووچە دەێنردرێت.

 

وێنە گەورەکە: ڕۆژانی 8 و 9 ئەم مانگە، بە سەرپەرشتیی سەرۆکوەزیران بارزانی، ژمارەیەک کۆبوونەوە لەنێوان هەردوو ئەنجوومەنی وەزاریی عێراق بۆ ئابووری و ئەنجوومەنی ئابووریی هەرێمی کوردستان لە شاری هەولێر بەڕێوەچوو، تیایدا چەند ڕێککەوتنێک کراو و ناوەڕۆکی ڕێککەوتنەکە لە کۆبوونەوەی ئەنجوومەنی وەزیرانی عێراق خراوەتەڕوو. 

 

ڕاگەیێنراوی فەرمی: ئەنجوومەنی وەزیرانی عێراق ڕایگەیاند: ئەنجوومەن ناردنی مووچەی فەرمانبەرانی هەرێمی کوردستان لە لایەن وەزارەتی دارایی پەسەندکرد و وەزارەتەکە بەردەوام دەبێت لە خەرجکردنی مووچەی فەرمانبەرانی هەرێمی کوردستان کە مووچەکانیان ڕاگیرابوو بەهۆی نەبوونی ژمارەی وەزیفی. 

 

زانیاریی زیاتر: ئەنجوومەنی وەزیران عێراق دەشڵێت: دەبێت حکومەتی هەرێمی کوردستان پابەند بێت بە تەواوکردنی ڕێکارەکانی دروستکردنی ژمارەی وەزیفییان لە وەزارەتی پلادانانی عێراق.

 

ئەوەی پێویستە بیزانیت: بڕیارەکەی ئەنجوومەنی وەزیرانی عێراق بەپێی رێکارە کارپێکراوەکانە وەک تەواوی فەرمانبەرانی عێراق و بڕیاری ئەنجوومەنی وەزیران ژمارە 229ی ساڵی 2022 لەسەر فەرمانگەکانی خەرجی لە هەرێمی کوردستان لە ڕێککەوتی 1ی کانوونی دووەمی 2025وە جێبەجێدەکرێت.

 

بۆچی گرنگە: وەزارەتی دارایی عێراق مووچە ڕاگیراوەکانی مانگی دوو تا مانگی هەشت دەنێرێت و بەردەوام دەبێت لە سەر خەرجکردنی مووچەی تەواوی فەرمانبەرانی هەرێمی کوردستان تاوەكو كۆتایی ئەمساڵ.