ئیسرائیل هێرشەکانی سەر هێڵەکانی گواستنەوەی گازی ئێرانی ئەنجامداوە

ئاڤا نیوز

 

ڕۆژنامەی نیویۆرک تایمزی ئەمریکی لە ڕاپۆرتێکیدا ئاماژە بەوە دەدات کە ئیسرائیل لە پشتەوەی ئەو هێرشانە بووە کە لە ڕۆژانی ڕابردوودا کراونە سەر هێڵەکانی گواستنەوەی گاز لەناو ئێران. 

 

وێنە گەورەکە: بەرپرسانی ڕۆژئاوایی و شارەزایانی سەربازیی ئێرانی بە رۆژنامەکەیان گوتووە ئۆپەراسیۆنی لەو چەشنە لەناو خاکی ئێراندا پێویستیی بە بوونی زانیاریی زۆر لە بارەی ژێرخانەکانی ئێران و هەروەها بوونی هاوئاهەنگیی ورد هەیە، چونکە دوو بۆریی گواستنەوەی گاز لە چەندین شوێن و لە یەک کاتدا کراونەتە ئامانج. 

 

زانیاریی زیاتر: لەکاتێکدا، دوو سەرچاوەی نیویۆرک تایمز، ئەوەیان پشتڕاستکردووەتەوە تەقینەوەی کارگە کیمیاییەکەی نزیک تاران ئیسرائیل بووە، بەڵام ئیسرائیل بەرپرسیارێتیی ئەم هێرشانەی نەگرتووەتە ئەستۆ و ڕەتیشی نەکردوونەتەوە. 

 

لەلایەکی دیکەوە: بەرپرسانی ئێران باسیان لەوە کردووە تەقینەوەکە بەهۆی لێچوونی سووتەمەنییەوە بووە.

 

ئەوەی پێویستە بیزانیت: ڕۆژی چوارشەممە چەند تەقینەوەیەکی گەورە لە هێڵی گواستنەوەی گاز لە نزیک شار بروجن لە پارێزگای چوارمەحەل و بەختیاری ڕوویاندا. هەروەها ڕۆژی پێنجشەممەش تەقینەوە لە کارگەیەکی بەرهەمهێنانی ماددەی کیمیایی لە نزیک تاران ڕووی دا. بەهۆی تەقینەوەکانەوە دابەشکردنی گاز لە پێنج پارێزگای ئێران کێشەی تێکەوت.