ڕاگەیێنراوێکی سێ خاڵی لە وەزارەتی دارایی لەبارەی دابەشکردنی زەوی

ئاڤا نیوز

وەزارەتی دارایی و ئابووریی هەرێمی کوردستان لەبارەی دابەشکردنی فۆرمی زەوی بەسەر فەرمانبەران دەنگۆیەک ڕەتدەکاتەوە.


ڕاگەیێنراوی فەرمی: وەزارەتی دارایی و ئابووری ئەو دەنگۆیانە ڕەتدەکاتەوە کە دەڵێن وەزارەتەکە ڕێگرە لە پێدانی فۆڕمی زەوی ب فەرمانبەران و مووچەخۆرانی تایبەت بە ڕێکخراوەکان.

یەکەم: وەزارەتی دارایی و ئابووری هیچ پەیوەندییەکی بە پێدانی فۆڕم و دابەشکردنی زەوی بەسەر فەرمانبەران و مووچەخۆراندا نییە و دوور و نزیک ئێمە بەشێک نین لەو بابەتە.   

دووەم: هەموو ئەو ڕێنمایی و ڕێکار و خاڵبەندییانەی بۆ پێدانی زەوی بۆ فەرمانبەران و خانەنشینان و تەواوی چین و توێژەکان دیاریکراوە، لە تایبەتمەندی و دەسەڵاتی وەزارەتی شارەوانی و گەشتوگوزاری هەرێمی کوردستانە.    

سێیەم: ئەو کەس و لایەنانەی وەزارەتی داراییان بە ڕێگری لە پێدانی فۆڕمی دابەشکردنی زەوی بەسەر فەرمانبەران و مووچەخۆرانی ڕێکخراوەکان تۆمەتبار کردووە،  هیچ زانیارییەكیان لەبارەی ڕێكار و شێوازی دابەشكردنی فۆڕمی زەوی بەسەر فەرمانبەراندا نییە و ڕاستگۆ نەبوون.