پارێزگای هەولێر: هەڵواسینی وێنە و پۆستەری کاندید لە ئۆتۆمبێل قەدەغە دەکرێت

ئاڤا نیوز 

 

لیژنەی ئەمنیی پارێزگای هەولێر ڕاگەیێنراوێکی بڵاوکردووەتەوە و دەڵێت، بانگەشەکردن بە کاروانی ئۆتۆمبێل و هەڵواسینی وێنە و پۆستەر بە ئۆتۆمبێل قەدەغەیە. 

 

ڕاگەیێنراوی فەرمی: لیژنەی ئەمنیی پارێزگای هەولێر، ئاگاداری هاووڵاتیان دەکاتەوە، ڕێکاری یاسایی بەرامبەر ئەو کەسانە دەگرێتەبەر ئەگەر ببنە هۆی ناڕەحەتی و بێزاری هاووڵاتیان، چەند شەوێکە لە شەقامە سەرەکییەکانى شار و شوێنە گشتییەکان، کەسانێک بە كاروانى زۆرى ئۆتۆمبێل و داپۆشى جام و ژمارەى ئۆتۆمبێلەکانیان بە وێنه‌ و پۆسته‌ر و دروشم و لۆگۆ و بەکارهێنانى ئامێرى بێزاركه‌ر، جگە لە دروستکردنى قەرەەباڵخییەکی زۆر و ئاسته‌نگى هاتووچۆ، بوونەتە هۆى ناڕه‌حه‌تى و بێزارىی هاووڵاتییان.

زانیاریی زیاتر: لە ئەمڕۆوە تاوەکو دەرکردنى بڕیارى پێویست لەبارەى بانگه‌شه‌ى هه‌ڵبژاردن، لە سنوورى پارێزگاى هەولێر بەهیچ شێوەیەک ئەو کارانە ڕێگەپێدراو نییە و ( پۆلیسى هاتووچۆ، ئاسایش، پۆلیس ) دەستکراوە کراون بۆ وەرگرتنى ڕێکارى یاسایی لە بەرامبەر هەر کەس و لایەنێک ئەو جۆرە سه‌رپێچییانە بکات، بەپێچەوانەوە هەرکەسێک پابەند نەبێت دەست بەسەر ئۆتۆمبێلەکەى دادەگیرێت.