عێراق دەرگای قوتابخانەکان بەڕووی قوتابییە ئاوارەکانی لوبنان دەکاتەوە

ئاڤا نیوز

 

وەزارەتی پەروەردەی عێراق ئاسانکاریی بۆ قوتابیانی ئاوارە لوبنانییەکان دەکات کە لە عێراقن، لەو بارەیەشەوە وەزارەتی پەروەردە ڕێنمایی وەرگرتن و کارئاسانی دەردەکات.

 

وێنە گەورەکە: لە ناوەڕاستی ئەم مانگە دا جەنگێکی خوێناوی لەنێوان ئیسرائیل و حیزبوڵڵای لوبنان دەستیپێکرد، بەو هۆیەوە ژمارەیەکی زۆری هاوڵاتییانی لوبنان ئاوارەی عێراق بوون، حکومەتی عێراق کارئاسانی بۆ وەرگرتنی ئاوارە لوبنانییەکان دەکات و دەرگای قوتابخانەکانی بەڕووی قوتابییەکانیان واڵا دەکات.

 

ڕاگەیێنراوی فەرمی: بەڕێوەبەرایەتی گشتیی خشتە و تاقیکردنەوەکانی وەزارەتی پەروەردەی عێراق،  نووسراوێکی بۆ بەش و بەڕێوەبەرایەتییەکان ناردووە و داوای لێکردوون قوتابییە ئاوارەکان لە نزیک قوتابخانەکان لە شوێنی مانەوەیان وەربگیرێن و چەند ڕێنماییەکی کارگێڕیی دیکە ڕوون کردووەتەوە.

 

زانیاریی پەیامنێر: دەروون مەلا ناجی، پەیامنێری ئاڤا میدیا لە بەغدا و باشووری عێراق ڕایگەیاند: بەشێک لە هاووڵاتیانی لوبنان بە ڕێگەی وشکانی و ئاسمانی گەیشتوونەتە کەربەلا و نەجەف، دوای ڕاگرتنی گەشتەکانی عێراق بۆ لوبنان تەنیا بە ڕێگەی وشکانی دێن و ئامادەکاری دەکرێت بەشێکیان بۆ بەغدا بگوزرێنەوە.

 

ئەوەی پێویستە بیزانیت: لە دوو هەفتەدا هەزار و 30 هاووڵاتی لوبنانی گیانیان لەدەستداوە، لەوانەش 156 ئافرەت و 87 منداڵ بوون و شەش هەزار و 352 هاووڵاتیش برینداربوون، هاوکات نزیکەی یەک ملیۆن هاووڵاتیش ئاوار بوون کە بەشێکیان ڕوویان لە سووریا و عێراق کردووە.