دەرهێنانی بەردی گزۆزی ئۆتۆمبێل هۆکاری پیسبوونی ژینگەی بەغدایە

ئاڤا نیوز

 

نزیکە چوار ئۆتۆمبێل لە شەقامەکانی بەغدا دەسوڕێنەوە و ژینگەی شارەکە پیس دەکەن، بەتایبەت ئەوانەی بەردی گزۆزیان دەرکراوە، حکومەتیش هیچ پلانێکی نییە بۆ ڕووبەڕووبونەوەی ئەم تاوانە ژینگەییە.

 

چیرۆکی سەرەکی: بەردی گزۆز چییە؟؛ بریتییە لە ماددەیەکی تێکەڵ لە کانزا و سیرامیک و لە شێوەی شانەی هەنگ دروست دەکرێت، ئەرکی هەڵمژینی ئەو گازە زیانبەخشانەیە کە لە گزۆزی ئۆتۆمبێلەوە دەردەچێت، بەڵام بەشێکی زۆر لە ئۆتۆمبێلەکانی عێراق بەردەکانیان دەرکراوە.

 

ڕاگه‌یێنراوی فه‌رمی: د.حوسێن جەبار، سەرۆکی بەشی ئەندازیاری ژینگە لە زانکۆی بەغدا ڕایگەیاند:  ئەو گازانەی لە دووکەڵی ئۆتۆمبێلەوە دروست دەبن، کاریگەری بەرچاویان دەبێت لەسەر کوالێتی هەوا، زیادبوونی پیسبوونی ژینگە، هاوکات دەبنە هۆی نەخۆشییەکانی کۆئەندامی هەناسە، شێرپەنجەی سییەکان، نەخۆشییەکانی دڵ و نەخۆشییە دەروونییەکان. 

 

ئەمەش بزانە: بەگوێرەی ئاماری ساڵانەی وەزارەتی تەندروستی عێراق، ژمارەی ئەو کەسانەی تووشی نەخۆشییەکانی کۆئەندامی هەناسە بوون، لە سەرانسەری عێراقدا گەیشتووەتە 10 هەزار و 334 کەس.

 

هۆکارە زانراوەکان: بەردی گزۆزی ئۆتۆمبێل لە بازاڕدا بە 500 تا 550 دۆلار مامەڵەی پێوە دەکرێت، لەبەرئەوەی پێکهاتەیەکی ژینگەیی هەیە و لەوڵاتان بەپێی یاسا مەرجە گزۆزی ئۆتۆمبێلەکان ئەو بەردەی تێدا بێت، بۆ ئەوەی دووکەڵی ئۆتۆمبێلەکان ژینگە پیس نەکات، بەڵام لە عێراق ڕێگری لە دەرهێنانی ناکرێت.