بەردی بناغەی جووتسایدی هەولێر - کۆیە دادەنرێت

ئاڤا نیوز

سەرۆکوەزیران مەسرور بارزانی بەردی بناغەی جووتسایدی هەولێر-کۆیە دادەنێت کە بە پێنج قۆناغ جێبەجێ دەکرێت و ماوەی ڕێگای نێوان هەولێر – کۆیە دەکاتە نیو کاتژمێر.

وێنەگەورەکە: ڕێگای هەولێر – کۆیە ناوەندێکی گرنگ و ستراتیژییە لە نێوان هەردوو پارێزگای هەولێر و سلێمانی، بڕیار بوو ساڵی 2014 تەواو بکرێت، بەڵام چەند ساڵێکە بە هۆکاری جیاواز کاری تێدا نەکراوە، ئەمڕۆ بە دیزاینێکی جیاواز بەردی بناغەی دادەنرێت.

ئەوەی پێویستە بیزانیت: ڕێکەوتی 25-09-2024 سەرۆکوەزیران مەسرور بارزانی لەکاتی لێدانی زەنگی ساڵی نوێی خوێندن لە کۆیە، مژدەی بە خەڵکی قەزاکە دا لە ئایندەیەکی نزیک دەست بە دروستکردنی جووتسایدی کۆیە - هەولێر دەکرێت.

ئەوەی ئێستا ڕوودەدات:  لە مەڕاسیمێکدا سەرۆکوەزیران مەسرور بارزانی بەردی بناغەی جووتسایدەکە دادەنێت و گوژمەی پڕۆژەکە نزیکەی 440 ملیار دینارە.

خاڵە ئەرێنییەکان: بەتەواوکردنی ئەو جووتسایدە شەش كیلۆمەتر ڕێگا كورت دەبێتەوە و لە 52 كیلۆمەترەوە دەبێتە 46 كیلۆمەتر. ماوەی ڕێگاکە نیو کاتژمێر کەم دەبێتەوە، ئەگەر ئۆتۆمبێلێک بەخێرایی 100 كیلۆمەتر لە كاتژمێرێک لە هەولێرەوە بۆ كۆیە بڕوات، بە ماوەی نزیکەی 30 خولەک دەگات.