ڕاوێژکاری ئەڵمانیا لەگەڵ ئەردۆغان کۆدەبێتەوە

ئاڤا نیوز

 

دوای کۆبوونەوە لەگەڵ سەرۆکی ئەمریکا و سەرکردەکانی فەرەنسا و بەریتانیا، ئۆلاف شۆڵز، ڕۆژی هەینی ڕاوێژکاری ئەڵمانیا بە سەردانێک گەیشتە تورکیا.

 

چیرۆکی سەرەکی: دوای کوژرانی یەحیا سینوار، بەرپرسی مەکتەبی سیاسی بزووتنەوەی حەماس لەلایەن ئیسرائیلەوە، وڵاتانی ڕۆژئاوا "هیواخوازن ببێتە دەرفەتێک" بۆ گەیشتن بە ئاگربەست لە غەززە. 

 

زانیاریی زیاتر: ئۆڵاف شۆڵز، ڕاوێژکاری ئەڵمانیا ڕۆژی هەینی گەیشتووەتە تورکیا، بڕیارە ئەمڕۆ شەممە لەگەڵ ڕەجەب تەیب ئەردۆغان، سەرۆککۆماری تورکیا کۆدەبێتەوە، بۆ تاوتوێکردنی بارودۆخ و قەیرانەکانی ڕۆژهەڵاتی ناوەڕاست.

 

ئەوەی پێویستە بیزانیت: ڕەجەب تەیب ئەردۆغان، سەرۆککۆماری تورکیا کە یەکێکە لە ڕەخنەگرانی ئۆپەراسیۆنەکانی ئیسرائیل لە غەززە و ئیسرائیل بە  ''دەوڵەتی تیرۆر ''ناو دەبات، بەردەوام ڕەخنەی ئەوە لە وڵاتانی ڕۆژئاوا دەگرێت پشتگیری لە تەلئەڤیڤ دەکەن.

 

لەلایەکی دیکەوە: ڕۆژی هەینی هاکان فیدان، وەزیری دەرەوەی تورکیا لەگەڵ ژمارەیەک بەرپرسی حەماس لە تورکیا کۆبووەوە و سەرەخۆشی وڵاتەکەی بەهۆی کوژرانی یەحیا سینوار بە بزووتنەوە فەلەستینییەکە گەیاند.