شەش لایەنیی سوننە لە سەر پۆستی سەرۆکی پەرلەمان ڕێکدەکەون

ئاڤا نیوز

بۆ یەکلاکردنەوەی پۆستی سەرۆکی ئەنجوومەنی نوێنەرانی عێراق، شەش لایەنی سوننە دوو بژاردەیان خستەڕوو.

 

وێنە گەورەکە: ئێوارەی ئەمڕۆ شەش لایەنی سوننە کە پێکهاتبوون لە هەر یەکە لە پارتی تەقەددوم بەسەرۆکایەتی حەلبوسی، جەماوەری نیشتیمانی، حەسم، پڕۆژەی نیشتیمانی عێراق، سەدارە و موبادەرە، بەیاننامەیەکی هاوبەشیان بڵاوکردەوە و دوو ڕێگا چارەیان خستەڕوو بۆ یەکلایکردنەوەی پۆستی سەرۆکی پەرلەمان.

 

زانیاریی زیاتر: بەگوێرەی بەیاننامەکە بژاردەی یەکەم ئەوەیە کە سەرجەم لایەنە سوننەکان کاندیدەکانیان بکشێننەوە و تەنیا پاڵپشتی لە کاندیدکردنی مەحمود مەشهەدانی بکەن بۆ ئەو پۆستە، بژاردەی دووەمیش  گرتنەبەری ڕێوشوێنی یاساییە لە ئەنجومەنی نوێنەران بۆ کاندیدکردنی کاندیدێکی نوێ کە کۆ دەنگی سوننەی لەسەر بێت.

 

ئەمەش بزانە: زیاتر لە 11 مانگە محەممەد حەلبووسی، بە بڕیاری دادگای فیدراڵی لە پۆستی سەرۆکی پەرلەمان دوورخراوەتەوە، لەوکاتەوە سوننەکان بەهۆی ناکۆکی نێوانیان نەیانتوانیوە کەسێک وەک جێگرەوەی هەڵبژێرن و پۆستەکەش تائێستا بەوەکالەت بەڕێوەدەبرێت.