كامالا هاریس دان بە شكست دەنێت و پیرۆزبایی لە ترەمپ دەكات

ئاڤا نیوز 

كامالا هاریس پیرۆزبایی لە دۆناڵد ترەمپی ڕکابەری دەكات، داواشی لێ دەكات سەرۆكی سەرجەم ئەمریكییەكان بێت.

چیرۆكی سەرەكی: دوای ڕاگەیاندنی ئەنجامە بەراییەکانی هەڵبژاردنی سەرۆکایەتیی ئەمریکا کە دۆناڵد ترەمپ، کاندیدی کۆمارییەکان لەپێشە، كامالا هاریس، كاندیدی دیموكراتەكان بە تەلەفۆن پەیوەندی پێوە دەکات و پیرۆزبایی سەركەوتنی لێ دەکات.

لێدوانی فەرمی: یەكێك لە ڕاوێژكارە هاوكارەكانی كامالا هاریس لە هەڵمەتی بانگەشەی هەڵبژاردن، كە نەیویستووە ناوی ئاشكرا بكرێت بە ڕۆژنامەی "واشنتن پۆست"ـی ڕاگەیاندووە، كامالا پەیوەندییەكی تەلەفۆنی لەگەڵ ترەمپ کردووە و پیرۆزبایی سەركەوتنی لێ كردووە.

ئەوەی پێویستە بیزانیت: كامالا جەختی لە گواستنەوەی ئاشتییانەی دەسەڵات لە دیموكراتەكانەوە بۆ كۆمارییەكان كردووەتەوە، داواشی لێ كردووە سەرۆكی سەرجەم ئەمریكییەكان بێت و بە یەك چاو سەیری هەمووان بكات.

باکگراوند: بەپێی ئەنجامە بەراییەکان دۆناڵد ترەمپ بە جیاوازی 45 دەنگ لەپێش کامالا هاریسی ڕکابەری دێت و لە کۆی 538 نوێنەری دەستەی هەڵبژێر، ترەمپ 277 نوێنەر و كامالا 232 نوێنەریان بەدەستهێناوە.