بەریتانیا و ئەوروپا پێكەوە ڕووبەڕووی كۆچی نایاسایی دەبنەوە

ئاڤا نیوز

بۆ كەمكردنەوەی كۆچی نایاسایی لە ئەوروپا و بەریتانیا، هەردوولا سەرقاڵی واژۆكردنی رێككەوتنێكن بۆ چاودێری وردی كەناراوەكانی یەكێتییەكە و بەریتانیا .

ئەوەی پێویستە بیزانیت: سەڕەڕای ئەوەی بەریتانیا لە یەكێتی ئەوروپا جیا بووەتەوە، بەڵام پێویستی بە هەماهەنگی هەیە لەگەڵ ئەوروپا بۆ ئەوەی سنورەكانی بپارێزێت لە كۆچبەری نایاسایی، لەسەر ئەو پرسەش لە لێكۆڵینەوە و كۆبوونەوەدایە لەگەڵ ئەوروپییەكان.

لێدوانی فەرميی: ریشی سوناك، سەرۆكوەزیرانی بەریتانیا ڕایگەیاند: كۆچی نایاسایی لە وڵاتەكەمان كۆتایی پێدەهێنین و رێگری دەكەین لە گەیشتنی كۆچبەران بۆ وڵاتەكەمان، بە تایبەتی لە نۆكەندی مانشی فەڕەنسییەوە.

لەلایەكی دیكەوە: بە گوتەی وەزارەتی ناوخۆی بەریتانیا ئەمڕۆ هەینی 23ـی شوباتی 2024، رێككەوتنەكە لەنێوان بەریتانیا و ئاژانسی ئەوروپی بۆ پاسەوانی سنوور و كەنارەكان  جێبەجێدەكرێت.

ژمارەكان وا دەڵێن: ساڵی ڕابردوو 45 هەزار كەس بە كۆچی نایاسایی لە بەندەرەكانی ئەوروپاوە ڕوویان لە بەڕیتانیا كردووە، لە چارەكی یەكەمی ئەمساڵیش كۆچی نایاسایی بۆ بەڕیتانیا بەتەواوەتی ڕووی لە زیادبوون كردووە.