لە ساڵێكدا زیاتر لە 500 سەربازی ئەمریكی خۆیان كوشتووە

ئاڤا نیوز

 

وەزارەتی بەرگری ئەمریكا (پێنتاگۆن) ڕایدەگەیێنێت، تەنها لە ساڵی 2023دا 523 سەربازی ئەمریكی خۆیان كوشتووە، ژمارەكەش بەراورد بە ساڵی پێشووتر بەرزبووەتەوە.

 

وێنە گەورەكە: خۆكوشتنی سەربازانی ئەمریكی لە حاڵەتەوە بووەتە دیاردەیەكی مەترسیدار و بەگوێرەی ئامارە فەرمییەكانی پێنتاگۆن، لە هەر 100 هەزار سەربازی ئەمریكی، ڕێژەی 9%ـی سەربازان كۆتایی بەژیانی خۆیان دەهێنن.

 

ڕاگەیێنراوی فەرمی: وەزارەتی بەرگری ئەمریكا لە ڕاگەیێنراوێكدا ئاماژەی بەوەكردووە، بەراورد بە ساڵی 2022، كە 493 سەرباز كۆتاییان بەژیانیان هێنابوو، ساڵی ڕابردوو ڕێژەكە بەرزبووەتەوە و زۆربەی ئەو سەربازانەی خۆیان دەكوژن، گەنجن.

 

هۆكاری زانراوەکان: بەگوێرەی لۆید ئۆستن، وەزیری بەرگریی ئەمریكا، تێكچوونی دۆخی دەروونی سەربازان بەتایبەت دوای گەڕانەوەیان لە جەنگ و ڕووبەڕووبوونەوە چەكدارییەكان، هۆكاری خۆکوشتنی ئەو سەربازانەیە.

 

چارەسەرەکان: بۆ كەمكردنەوەی دیاردەی خۆكوشتنی سەربازان، پێنتاگۆن بەپێویستی دەزانێت سەرباز لەكاتی تەواوبوونی ئەركەكەی، چەكەكەی ڕادەست بكاتەوە.