هونەرمەند زاهیر عەبدوڵڵا کۆچی دوایی کرد

ئاڤا نیوز

 

ئەمڕۆ هونەرمەندی بواری سینەما و شانۆ "زاهیر عەبدوڵڵا" بەهۆی سەختی نەخۆشییەکەیەوە کۆچی دوایی کرد. 

 

زانیاری فەرمی: ئەمڕۆ شەممە 23-11-2024، دوای ململانێیەکی توند لەگەڵ نەخۆشییە سەختەکەی کە شێرپەنجە بوو، "زاهیر عەبدوڵڵا" گیانی لەدەست دا، بڕیارە تەرمی "زاهیر عەبدوڵڵا" لە گۆڕستانی کەسنەزان بەخاک بسپێردرێت.

 

ئەوەی پێویستە بیزانیت: ڕۆژی یەکشەممە 3ـی تشرینی دووەمی 2024، بۆ جاری دووەم دۆخی تەندروستیی هونەرمەند "زاهیر عەبدوڵڵا" تێکدەچێت، ئەو کات پزیشکەکان بە هاوژینەکەی ڕاگەیاند، هیچ چارەسەرییەک بۆ نەخۆشییەکەی نییە، بۆیە بە ناچاری نەخۆشخانەیان جێهێشت و لە ماڵەوە لە ژێر چاودێریی بوو، دوای 20 ڕۆژ مانەوەی، ئەمڕۆ شەممە 23-11-2024 کۆچی دوایی کرد. 

 

لەلایەکی دیکەوە: سەرۆکی حکوومەتی هەرێمی کوردستان، بەهۆی کۆچی دوایی هونەرمەند زاهیر عەبدوڵڵا، سەرەخۆشی لە بنەماڵەی هونەرمەندەکە دەکات و دەڵێت: خواى مه‌زن گيانی بە بەهەشت شاد بكات و ئارامى و دڵنه‌وايیش بە بنەماڵەکەی ببەخشێت.

 

سەرۆکی حکوومەتی هەرێمی کوردستان، ئاماژەی بەوە داوە، زاهیر عەربدوڵڵا، هونەرمەندێکی نیشتمانپەروەر بوو و خزمەتێکی زۆری هونەری شانۆ و سینەمای کوردی کردووە و کەسایەتییەکی هونەریی دیاری شاری هەولێریش بوو.

 

باکگراوند: لە 27ـی حوزەیرانی ئەم ساڵ هونەرمەند زاهیر عەبدوڵڵا، بۆ چارەسەریی پزیشکی ڕەوانەی وڵاتی تورکیا کرا و نەشتەرگەریی بۆ کرا، دواتر گەڕایەوە هەرێمی کوردستان.