ئەمساڵ مۆڵەتی وەبەرهێنان بە 200 پرۆژە دەدرێت

ئاڤا نیوز

 

ئامانجی دەستەی وەبەرهێنانی هەرێمی کوردستان بۆ ساڵی 2024 پەرەپێدانی سەرجەم سێکتەرەکانی وەبەرهێنانە، لەم چوارچێوەیەدا مۆڵەت بە 200 پرۆژە دەدرێت و زەوییان بۆ دابین بکرێت.

 

وێنە گەورەکە: ئەنجوومەنی وەزیران دەسەڵاتی داوەتە دەستەی وەبەرهێنان کارئاسانی بۆ ئەنجامدانی پرۆژە لە سێکتەرەکانی پیشەسازی، کشتوکاڵ و گەشتیاری بکات؛ پلانی دەستەکەش ئەوەیە ئەمساڵ مۆڵەت بە  200 پرۆژە بدرێت.

 

لێدوانی فەرمی: محەممەد شوکری، سەرۆکی دەستەی وەبەرهێنان بە ئاڤا نیوزی گوت: "بۆ ئەوەی  دەست بە دروستکردنی ناوچە پیشەسازییەکان بکرێت، زەوییان بۆ دابین دەکرێت، پاشان زەوی بۆ پرۆژەی کشتوکاڵی ئامادە دەکرێت و دواتر کار لەسەر بووژانەوەی کەرتی گەشتیاری دەکرێت".

 

باکگراوند: لە ساڵی 2023 مۆڵەت بە 151 پرۆژەی وەبەرهێنان دراوە، پرۆژەکانیش 10 هەزار هەلی کاریان ڕەخساندووە.