سوپای سووریا لە حەما دەکشێتەوە

ئاڤا نیوز

 

ئاژانسی هەواڵی سانای سووری ئاشکرای کرد کە سوپا سووریا لە سەنتەری شاری حەما دەکشێتەوە و لە دەورووبەری شارەکە بڵاوەیان پێدەکرێت. 

 

چیرۆکی سەرەکی: دوای هێرشی هێزەکانی ئۆپۆزسیۆنی سووریا لەژێر ناوی دەستەی تەحریر شام بۆ سەر شاری حەلەب و دەنگۆیی چوونی هێزەکانی حەشدی شەعبی و هێزەکانی حیزبوڵڵای لوبنان وەک دوو هێزی نزیک لە ئێران بۆ سووریا، بە مەبەستی پاڵپشتی لە هێزەکانی سوپای سووریا بڵاوکرایەوە.

 

ڕاگەیێنراوی فەرمی: وەزارەتی بەرگری سووریا ڕایگەیاند: بە مەبەستی سەلامەتی و پاراستنی گیانی خەڵکی سڤیل، هێزەکانمان لە سەنتەری پارێزگای حەما کشاندەوە و نامانەوێت خەڵکی لەو ناوچەیە ببنە قوربانی. 

 

زانیاریی زیاتر: سوپا سووریا باسی لەوەشکرد، لەماوەی چەند کاتژمێری ڕابردوودا، لەگەڵ زیاتربوونی ڕووبەڕووبوونەوەکانمان لەگەڵ گرووپە چەکدارییەکان و بەرزبوونەوەی ژمارەی "شەهیدان" لە نێو ڕیزەکانی هێزەکانماندا، ئەم گرووپانە توانیویانە بچنە نێو شاری حەما. 

 

قوڵتر: ئەم کشانەوەی سوپای سووریا لە کاتێکدایە کە ڕووبەڕوونەوەی چەکداری لە نێوە شارەکان زیاتر بووە و ئەو یەکە سەربازییانەی لەو ناوچانە جێگیر کرابوون ئێستا گواستراونەتەوە بۆ دەرەوەی شار، ئەمەش بە گوێری ڕاگەیێنراوی سوپای سووریایە. 

 

لەلایەکی دیکەوە: ئەبو محەممەد جۆلانی، سەرۆکی دەستەی تەحریری شام، پشتڕاستی ئەو ڕاگەیێنراوە دەکاتەوە کە هێزەکانیان چوونەتە نێو شاری حەما و دەڵێت: "توانیمان بچنە نێوەندی شار، بۆ پاککردنەوەی ئەو برینەی کە بۆ ماوەی 14 ساڵە لە سووریا بەردەوامە".