ئیسرائیل بە ئەنجامدانی 310 هێرش ژێرخانی سەربازیی سوپای سووریا وێران دەکات

ئاڤا نیوز

 

دوای هەڵهاتنی بەشار ئەسەد، ئیسرائیل لەڕێگەی ئەنجامدانی سەدان هێرشی ئاسمانییەوە دەیەوێت توانای سوپای سووریا بەتەواوەتی لاواز بکات، تاوەکو لە داهاتوو نەبێتە مەترسی بۆ سەر ئاسایشی وڵاتەکەی.

 

وێنە گەورەکە: سوپای ئیسرائیل کەوتنی دەسەڵاتی بەشار ئەسەد بە دەرفەت زانیووە بۆ ئەوەی سوپای سووریا لاواز بکات، چونکە ئیسرائیل سوپای سووریا بە هەڕەشە بۆ سەر ئیسرائیل دەبینێت، بۆ ئەو مەبەستەش لە ماوەیەکی کەمدا ئیسرائیل 310 هێرشی بۆ سەر فرۆکەخانە، کۆگای چەک و تەقەمەنی لە سووریا ئەنجام داوە.

 

بڵاوکراوەی فەرمی: بەگوێرەی ڕاپۆرتی ڕوانگەی سووری بۆ مافەکانی مرۆڤ، ئیسرائیل 310 هێرشی بۆ سەر فڕۆکەخانە، وێستگەی سیگناڵی سەربازیی، چەندین کۆگای چەک و تەقەمەنی لە زۆربەی پارێزگاکانی سووریا ئەنجام داوە.

 

ئەوەی لەبارەیەوە دەگوترێت: ماتیو میلەر، گوتەبێژی وەزارەتی دەرەوەی ئەمریکا ڕایگەیاند: " ئەم کارانەی ئیسرائیل بەشێوەیەکی کاتین و ئامانجیان بەرگریکردنە لە سنوورەکانی. ئەمانە کردەی بەردەوام نین. بۆیە دواجار ئەوەی کە ئێمە دەمانەوێت بیبینین سەقامگیرییەکی بەردەوامە لە نێوان ئیسرائیل و سووریا، واتە ئێمە پشتیووانی هەموو لایەنەکان دەکەین بۆ جێبەجێکردنی پابەندییەکانی ڕێککەوتنی 1974."