ساڵی داهاتوو کار بۆ هەناردەکردنەوی نەوتی هەرێمی کوردستان دەکرێت

ئاڤا نیوز

 

لیژنەی دارایی پەرلەمانی عێراق ئاشکرای دەکات، بڕیارە سەرەتای ساڵی داهاتوو 2025 هەمواری بڕگەی هەناردەکردنی نەوتی هەرێمی کوردستان ببێتە بابەتی سەرەکی دانیشتنەکانی پەرلەمان، تاوەکو جارێکی دیکە نەوتی کوردستان هەناردەی بازاڕەکان بکرێتەوە.

 

بۆچی گرنگە: ماوەی زیاتر لە  ساڵێک و هەشت مانگە هەناردەی نەوتی هەرێمی کوردستان وەستاوە، بەهۆیەوە عێراق زیانی زیاتر لە 20 ملیار دۆلاری بەرکەوتووە، پەرلەمانیش دەیەوێت چەند بڕگەیەکی تایبەت لە یاسای بودجە سێ ساڵیەکەی حکومەت هەموار بکاتەوە، بۆ ئەوەی عێراق زیانی زیاتر نەکات و لە هەمان کاتدا بتوانن بەبێ گرفت مووچە و بودجەی هەرێمی کوردستان بنێرن.

 

لێدوانی فەرمی: عەتوان عەتوانی، سەرۆكی لیژنەی دارایی پەرلەمانی عێراق ڕایگەیاند: سەرەتای ساڵی داهاتوو هەمواری خشتەی بودجە دەبێتە بابەتی سەرەکی کۆبوونەوەکانی پەرلەمان و بڕگەی هەناردەکردنی نەوتی هەرێمی کوردستانیش لە خۆ دەگرێت.

 

ئاماژەی بەوەشکرد، تەنیا زیادکردنی بڕگەی نوێ بۆ خشتەی بودجەی ساڵی 2025 ئامانجی هەمواری یاساکە نییە، بەڵكو دەبێت دوای پەسەندکردنی وەک خۆی جێبەجێ بكرێت.