دەزگای ئاسایشی هەرێمی کوردستان: ئەمساڵ 636 تیرۆرستمان دەستگیرکردووە

ئاڤا نیوز

 

دەزگای ئاسایشی هەرێمی کوردستان ڕایگەیاند، لە ساڵی 2024دا هێزەکانیان 257 ئۆپەراسیۆن و 74 کێوماڵیان بۆ بەرەنگاربوونەوەی تیرۆر ئەنجامداوە و تیایدا 636 "تیرۆرست"یان دەستگیرکردووە.

 

ئەوەی پێویستە بیزانیت: بۆ ڕووبەڕووبوونەوەی تیرۆر و کۆنترۆڵکردنی ماددە هۆشبەرەکان، هێزە ئەمنییەکانی عێراق و هەرێمی کوردستان هەماهەنگییەکی سەربازیی و هەواڵگریی باشیان هەیە، لە دەرئەنجامیشدا تا ئێستا هەزاران داواکراو دەستگیرکراون و ڕووبەڕووی یاسا کراونەتەوە.

 

لێدوانی فەرمی: عەقید سەلام عەبدولخالق: بەڕێوەبەری ڕاگەیاندنی دەزگای ئاسایشی هەرێمی کوردستان ڕایگەیاند:

- لە ساڵی 2024دا هێزەکانیان 636 "تیرۆرست"یان دەستگیرکردووە کە بەگوێرەی ماددەکانی 2 و 4 لە یاسای سزادانی عێراقی داواکراو بوون

- هاوکات 126 ئۆپەراسیۆنی هاوبەشیشان لەگەڵ هێزە ئەمنییەکانی عێراق ئەنجامداوە.

-لەو ساڵەدا هەزار و 19 کەس بەتۆمەتی پەیوەست بە ماددە هۆشبەرەکان دەستگیرکراون، دەستیشگیراوە بەسەر سێ تۆن و 24 کیلۆگرام ماددەی هۆشبەر.

- ئەمساڵ سێ هەزار و 283 سکاڵای پەیوەست بە تاوانی ئەلیکترۆنی و 10 هەزار و 157 سکاڵای جۆراوجۆری دیکەیان بەدەستگەیشتووە و بەدواداچوونیان بۆ کردوون.