چوونی پەنابەران بۆ ئەوروپا بەڕێژەیەکی بەرچاو زیادی کردووە

ئاڤا نیوز

سەرەڕای تووندکردنی ڕێوشوێنەکانی یەکێتیی ئەوروپا بۆ بەرەنگاربوونەوەی قەیرانی پەنابەران، داوای مافی پەنابەرێتیی لە وڵاتانی ئەوروپا بەڕێژەیەکی بەرچاو زیادی کردووە. 

 

ڕاگەیێنراوی فەرمی: یەکێتیی ئەوروپا ڕایگەیاند: ژمارەی داواکاریی مافی پەنابەری لە وڵاتانی ئەوروپا گەیشتووەتە زیاتر لە یەک ملیۆن و 14 هەزار داواکاری.

 

زانیاریی زیاتر: سوورییەکان و ئەفغانییەکان لە پلەی یەکەم و دووەمی لیستی داواکارەکانن و تورکەکان لەپلەی سێیەمدان.

 

 ژمارەکان وا دەڵێن: بەگوێرەی داتاکانی ئاژانسی پەنابەری یەکێتیی ئەوروپا، داواکارییەکانی پەنابەری لە ساڵی 2023 بە ڕێژەی 18% بەرزبووەتەوە و گەیشتووەتە یەک ملیۆن و 14 هەزار کەس، ئەمەش بەرزترین ئاستە لە دوای قەیرانی کۆچبەران لە ساڵی 2015-2016.

 

ئەوەی ئێستا ڕوودەدات: بەهۆی هێرشەکانی ئیسرائیل بۆ سەر غەززە، 11هەزار و 600 فەڵەستینی داوای مافی پەنابەرێتییان لە وڵاتانی ئەوروپا کردووە. بەڵام، بەهۆی ئەوەی بەشێک لە وڵاتانی ئەندام لە یەکێتیی ئەوروپا "دان بە فەڵەستیندا نانێن" ئامارێکی دروست تۆمارنەکراوە.