هۆکاری ئەنجامنەدانی دانیشتنی پەرلەمانی عێراق ئاشکرا دەکرێت

ئاڤا نیوز

 

لیژنەی یاسایی پەرلەمانی عێراق هۆکاری ئەنجامنەدانی دانیشتنی نائاسایی پەرلەمانی بۆ درێژکردنەوەی دەستەی کۆمیسیارانی کۆمیسیۆنی باڵای سەربەخۆی هەڵبژاردنەکان لە عێراق ئاشکرا کرد. 

 

چیرۆكی سه‌ره‌كی: بڕیاربوو ، ئەنجوومەنی نوێنەرانی عێراق دانیشتنێکی تایبەت سەبارەت بەدرێژکردنەوەی تەمەنی یاسایی دەستەی کۆمیسیارانی کۆمیسیۆنی باڵای سەربەخۆی هەڵبژاردنەکان درێژبکاتەوە، چونکە ڕۆژی 6-1-2025 تەمەنی یاسایی ئەو ئەنجوومەنە کۆتایی هات. 

 

لێدوانی فەرمی: دارا سێکانیانی، ئەندامی لیژنەی یاسایی پەرلەمانی عێراق بەئاڤا میدیای ڕاگەیاند:

- هیچ پاساوێک نییە بۆ درێژکردنەوەی تەمەنی دەستەی کۆمیسیارانی کۆمیسیۆنی باڵای سەربەخۆی هەڵبژاردنەکانی عێراق، بۆ ئەو مەبەستەش تاوەکو ئێستا هیچ ڕێککەوتنێکی پێشوەختە نەکراوە، ئەمەش هۆکاری ئەنجامنەدانی دانیشتنەکەبوو.

- سێکانیانی ئاماژەی بەوەشکرد، 9-1-2025 خولی نوێی یاسادانانی پەرلەمانی عێراق دەست پێدەکاتەوە و دەرفەتێکی زۆریشی لەپێشە تاوەکو دەستەیەکی نوێی کۆمسیاران هەڵبژێرێت. 

 

ئەوەی پێویستە بیزانیت: تاوەکو ئێستا دووجار تەمەنی دەستەی کۆمیسیارانی کۆمیسیۆنی باڵای سەربەخۆی هەڵبژاردنەکانی عێراق درێژکراوەتەوە، یەکەمیان بۆ هەڵبژاردنەکانی ئەنجوومەنی پارێزگاکانی عێراق، دووەمیش بۆ سەرپەرشتیکردنی هەڵبژاردنی پەرلەمانی کوردستان بووە.