لە بەردەم بنکەیەکی پۆلیسی هەولێر كەسێك تەقە دەكات و دوو پۆلیس بریندار دەكات

ئاڤا نیوز

پۆلیسی هەولێر ڕایدەگەیەنێت، تۆمەتبارێك كە فەرمانی دەستگیركردنی هەبوو، دوای دەستگیركردنەكەی لەلایەن كوڕی تۆمەتبارەكەوە تەقە لە هێزە ئەمنییەكان دەكرێت و دوو پۆلیس بریندار دەبن.

 

چیرۆكی سەرەكی: تۆمەتبارێك كە فەرمانی دەستگیركردنی هەبووە، دەچێتە نێو فەرمانگەی كارتی نیشتمانی هەولێر، تیمەكانی پۆلیس ئاگادار دەكرێنەوە و دەستبەجێ دەگەنە شوێنی مەبەست و تۆمەتبارەكە دەستگیردەكەن، دواتر لە گۆڕەپانی بەردەم بنكەی پۆلیس، كوڕی تۆمەتبارەكە تەقە دەكات و بەهۆیەوە دوو پۆلیس بە سووكی بریندار دەبن.

 

ڕاگەیێنراوی فەرمی: بەڕێوەبەرایەتیی پۆلیسی پارێزگای هەولێر ڕاگەیێنراوێكی بڵاوكردەوە و ڕایگەیاند: دوای ئەوەی تۆمەتبارێک بە ناوی (ط. ر. ت) دەچێتە نێو فەرمانگەی کارتی نیشتمانی کە فەرمانی دەستگیرکردنی هەبوو، تیمەکانمان ئاگادار دەکرێنەوە و دەستبەجێ دەگەنە شوێنی مەبەست و تۆمەتبار دەستگیر دەکەن، دواتر لە گۆڕەپانی بەردەم بنکەی پۆلیس، تۆمەتبارێکی تر بەناوی (ک. ط. ر) کە کوڕی تۆمەتباری ئاماژە پێكراوە، تەقە دەکات و لە ئەنجامدا دوو پۆلیس بە سووکی بریندار دەبن، ئێستاش هەردوو تۆمەتبار دەستگیر کراون و ڕووبەڕووی یاسا دەکرێنەوە.